US in tlungmi Lai Pastor Pa nih Hakha a tonmi amah zong amah zong mitthi tla in a ṭap

Hmuhning

USA khuasa Lai Pastor pakhat cu Laitlang ah a rak tlung i thlakhat a cam hnu a kir lei ah viewpoint in khua ka cuan tak lai tiah a luh pah ah ruah lo piin aw thang takin a tap, cu lio ah viewpoint a kai mi zong an um i, an lau tuk cio.

A kir pah Rangon a phak hlan cu rawl zong ei lo in mithli he aa ciah i, a phak nihnih hnuah a tahnak ruang a phuan. US in kaa thawh ah kaa ngaih tukmi cu Laitlang phak i hawikom rual le cingla rualchan, Laitlang i a um mi minung poah hmuh lai kaa ngaihtuk, kaa ngaih bantuk in ka phan i thlakhat ka cam, Laitlang kan thutum ning le kan nun caan hna ka hun theih chin chin.

kaa ngaihnak le kaa ruahchannak vialte cu ngaihchihnak in maw bei donghnak in dik ka khat, kan unau kan cingla rualchan ka hmuh hna ka ton hna tikah ka ngaih a chia, khua mi, khuapi chung khuate lei hna ka kal ka vahnak ah mipi ka hmuh hna ahhin ka hnakruh a ka tam, ziah Laimi cu Pathian a bia mi 97% kan si ti cu ka hngalh, Pathian a bia lomi miphun cu Laitlang ahcun an um lo tluk khan a va si kaw, khawi ah dah kan Pathian biaknak cu a si tiah kei mah le kei mah bia kaa hal.

Biakinn a phan lomi hna kha cu va um rih seh, a fel ko, aa hrinthan ko tiah ka ruah mi hna hmanh hi ka hmuh hna an kong ka theih hna ahhin, a ka thirh hnik, Biakinn lawngah maw Laimi nih Pathian a bia mi kan rak si tiah ka lungchung in kaa ti. Biakinn chung hmanh ahcun, thil thuam a langhtermi hmuhsaknak a tuahmi hna khi kan lo, thilthuam a tha mi i hruk hna hlah seh ka ti duhnak a si lo, ka chim duhmi cu an thinlung/ an mithmai ah Bawipa cuan dawh a si lo.

A lenglei thut dir, khuasaknak ah chungkhar ah lung i rualnak a tlawm, Inn pa chak tlang le bang cu, a ning hngal deuhmi le aa hrinthan deuh lomi poah nih a inn pa a uk ti awkin a um, hi tihin thil ka tuah ahcun ka innpa caah hna hnawk a si maw, keimah zalawn nak lawng a si maw, keimah duhnak lawng maw a si, timi a ruat mi an tlawm. mah nih tuah mi poah kha a dik le a hmaan bik ah a ruat, inn pa zawn a ruat lomi an tam. hawi kom kongah cu thiam thaim ka hawinu ka hawipa hi ka daw tak maw, thil nih a kalpi mi cung lawngin maw ka dawt tihi aa ruahmi an tlawm.

cucu va um rih seh, a nu le pa hmanh a daw kho lo an tam cang. hringtu nu le pa cu, ca an thiam lo zongah hawi a bangh lo zongah kan dawt hna awk a si ti cu, Bible hrim nih a kan chawn piak mi a si bantuk in, cu zongah cun kan bau tuk rih. tulio Hakha cu a thangcho lio mi a si tikah hmunhma hi a sunglawi tuk lio a si i, nai zongah Rev. tiang hmanh thongthlak an si. duhfah hahkauhnak, hnemnak, dinfellonak in a khat chin cang.

nu le va kar zongah i lunghrinh awk phun thil hna hi a tam chin cang, nungak le tlangval kar zongah nupa sinak a him lo ning hi a lang chin cang. aa pehtlai lo nain van peh ka duh mi te cu, Kan Lai nungak pawl cu kawl pawl zei a si lomi hna zong nih ngah an i fawih tuk timi ka theih chin lengbang cu, society sinak lei zongin kan miphun sinak a zuarmi le kan khrihfa sinak zei ah a chia lo timi ka hmuh tikah hin ka lungfak tuk.

Acozah zong dinfelnak a um lo, chawva in laitlang an hrawh dih, Pastor te zong thlarau in a khat lomi Pastor an tam tuk, Pathian mithmai zoh loin member mithmai an zoh deuh cang. member zong nih Pastor te an kong ceih le thangchiat hi thluachuah hmuh lonak a si an thei lo. Pastor te zong nih fawi tukin bia hi member cungah an thlah ton, kan bia le hla hi zeitluk in dah mual a ngeih ti an i thei rua lo. cu caah Pastor te cu member caah thluachuah ngeitu nan si bantuk in Pathian thinhunnak member cungah a tlun ter kho tu nan si. thin fual tein khua nan ruah i nan nun a hau.

a tawinak in ka langhter mi hna hi Bawipa theih le Pathian hngalh, A mah dawtnak le dawt lonak nih a chuah pimi thil hna an si. Hakha in kaa thawh i viewpoint in khua a cuanh lio bakah tap loin ka um kho lo, ka thinlung nih a celh lo, Laitlang hi a thangcho tiah mipi nih an chim len mi cu, Thlarau lei ah a zor chin, a hrawk chin tiin ka hmuh tikah tap lo kho ka si lo. Laimi nih Pathian an bia tak tak maw, an daw tak tak maw timi hi a lang. Hi lawng a si lo, chim ding tampi a um rih. kan i ruah than te lai.

Note: Kanmah nih a bia kan remhmi le kan chapmi biafang pakhat hmanh a um lo, The Chin Theitlei nih a langhter ningin kan vun langhter thanmi a si.

______

Copyright © Chin World News Evening

Leave a Reply