US in Tamu peng, Khawhmun Nuam khua ah thitumh puai a tuahtu Thang Lensing Baite cu thla (6) thongthlakpinah phaisa ting (10) cawi liamter dingin biachahnak tuahpiak a si tiah theih a si.

Covid-19 zawtnak ruangah ahohmanh mibu cawlcanghnak pehtlai in puai tibantuk zeihmanh tuah lo dingin Cozah nih thawngthahnak an tuah cang bantukin cu thawngthanhnak a ngai loin phung a buarmi le a mibu cawlcanghnak a tuahmi cu phungning tein dantak an si lai tiah khuakip sangkipah thawngthanhnak an tuah.

Thang Lensing Baitecu March ni (28) chun ah Tamu nu he Khawhmun Nuam khua ah thitthumhnak puai an tuah i puai a zawhmi hi minung (100) hrawng an si. Cu ruangah Tamu khua bawi bawmtu U Kyaw Kyaw Lin nih Tamu peng palik zungah La-wa-kah pohmah 30 in report nak a tuah i biaceih zung tiang chuahpi asi nak hi a si. Cu lawng si loin Immigration zung zong nih La-Wa-Kah act pohmah 13 (1) in biaceih zungah taza a cuai ve.

Cuticun April ni (3) chun ah Tamu Peng biaceih zung nih Thang Lensing Baite cu La-Wa-Kah acts pohmah 13 (1) in phaisa ting (10) liamter siseh tiah biachahnak an tuah piak. Cu bantuk thiamthiam in Thang Lensing Baite i hringtu a pa Pu Thang Kho Lun zong nawlngeitu hna siannak tel loin US a rak tlungmi an inn ah an umter hnanak theihternak zeihmanh a tuah lo ruangah Tamu La-Wa-Kah nih pohma 5 (1) nih phaisa ting (10) liamter dingin biathluknak an tuah ve.

Nupi thitpa Thang Lensing Baite cu mibu cawlcanghnak tuah lo ding tiah Cozah nawlchuahmi nawl ngai loin phung a buar ruangah phungding tein La-Wa-Kah pohmah 30 (a) in tazacuai in thla (6) chung thongthlak dingin biathlehnak an tuahpiak hi a si. Ref: Cirhti