Tutan ah Covid-19 nih vawlei pumpi biatak tein a hung buaiter ngaingai. Cu lioah Chinmi zong a ngeimi an pah len cang. Cu lioah Covid-19 a ngeimi Chinmi chungin a dammi Pu Chawlsawlin Zaathang nih  a tonmi thil kong a chimmi hi rak ngai ve cio uh! Hihi ramkip a ummi Chinmi nih kan theih hrimhrim aherh. Zeitindah an i thlop i an dam ning a si timi kongah theih a herh ngaingaimi a si. Cucaah Indianapolis ah a ummi Pu Chawlsawlin Zaathang nih a tonmi kong a chimmi rak ngai ve hrimhrim.

Zeitik in dah Covid-19 zawtnak na ngeih hi na theih tiah bialnak an halmi i Pu Chawlsin Zaathang nih cun zawtnak angei kong hitihin a chim “Cozah zulhphung an chuah i mi zahpi i ton lo dingin le stay at home timi zulhphung an chuah hnuah mi cheukhat Company cu rianṭuan peng a si i kanmah rianṭuannak company hi kan ṭuan peng. March 18/2020 ahhin ka dam pah ti lo, cu ti ka dam lo cu ka khua a sik, ka ruahkhua a fak laitlang lei rairenh ah ka ruah. Cu hnu zongah cun rian cu ka tuan chih i March 19 i rianṭuan dingin kan vun i thawh ṭhan cu kan company rianṭuannak cu an khar dih i a chungah nan lut kho lo nan rianṭuan hawi lakah Covid-19 Positive a ngeimi an um tiah an kan ti i cuticun kan inn leiah kan ṭin ṭhan. A thaizing ah ka dam lo deuhdeuh cun, ka zawtning tlawmpal a hung zual deuh tikah lai lei raifenh bantuk ah ka ruah i keimah tein sii ka dinpiak. Ka chim duh bikmi cu March 18 le 19 in ka dam lo hi kai theih. Asinain Coronavirus ka si cu kai thei rih lo,” tiah a chim.

Zeitindah Doctor te sinah thawng na theih hna i Covid-19 zawtnak ka ngei ti hi na namhneh khawh tiah biahalnak an tuah ṭhan i cu biahalnak cu hitihin a leh ṭhan. A chimmi cu “March 18-19 in dam lo hi kai thawk i cuticun sii cu kei hei din piak. Asinain ka ṭha hlei lo i ka zawt tu a kai/zual deuh. Ka lung a nuam pah lo zirziar tlangrai a tam kha ka theih ve ko tikah ka thinglung a nuam ti lo. Cun, kan rianṭuannak ah  Positive minung an hmuh hna ti kha ka theih cang caah ka thinlung a nuam kho ti lo.

Kha lio ah ka zawtnak ka zoh tikah le mitampi deuh nih an rak chim tawnmi cu Covid-19 na si cun, na thawh chuah a har lai, na khuh lai ti a si tikah ka thawchuah a har lo, ka khuh fawn lo tikah hihi cu raifenh si ko lai tiah a caan ah lung nuam loin ka um. Sii biatak tein a phunphun ka din piak i a ṭhat hlei lo tikah ka theih hnu ni 4-5 hnuah emergency in sizungah ka kal. Siibawite sinah cun kai piah. Sibawite sinah cun ka dam lonak kong cu ka chimh hna i siibawite nih an kan timi cu Virus cu na si hraw lai lo, asinain virus ka si tiah nai ruah lai,” an kan ti cucu na runvennak ah aṭha bikmi le na chungkhar caah a ṭha bikmi le na miphun hawi caah a ṭha an ka ti i prove an ka tuah lo. Cutikah Sibawite na hal duhmi a um maw tiah an kan ti i aw ka duh ko. Covid-19 ka ngei ti i ruahnak cun fiang tein ka check ulaw prove rak ka tuah ulaw dam lo ah cun dam lo, Virus ka si cun Virus, a si lo cun si lo tiah ka chim ulaw ka duh tiah ka ti hna. Sibawite nih an ka timi cu Coronavirus hi a zawmi paoh kan check hna lo.

A zual cangmi sizungah thlopbul a hau cangmi a rethei cangmi akhuh cangmi a thawchuah har cangmi a tha dih cangmi thloopbul tuah tikah prove ta ahau Heath Department lei ah kan tuah i anmah nih an zawtnak kha rak check ko uh an ti hnu lawngah kan check hna i Prove ka tuah hna i sizungah free min kan zohkhenh hna. Nangmah cu cubantukin thlopbul haumi na si lo caah Heath Department lei nih an in prove lai lo kanmah nih Check kan in duh zongah an ka ti. Cun ramdang leiin a tlungmi na si ahcun Fever na ngeih le cangka in an in check khawh. Cun zawtnak a ngeimi hna sinah na um i zawtnak a ngeimi na theih hna si ahcun kan in check khawh ko cu lo cun kan in check lai lo an ka ti.

Cu tikah ka thluah vuk a vun kaimi cu si rian ka ṭuannak ah positive minung an hmuh hna. Minung zeizat an si ka theih hna lo. Ka lung a nuam lo ka tak a linh tik ahhin tiah tiah ka ti hna. Kha hnuah Sibawipa nih a si ahcun Health Department lei kan chawnh hna lai a ti i Health Department lei cu an chawnh hna. Minute tlawmpal ah Prove an in tuah check ko uh aruang cu arianṭuan hawi a zawmi caah ti na si tiah an kan ti. Cu zawnte ah vun fianter ta ka duhmi cu a zawmi paoh an check hna lo. Virus si ko lai tiah an zumhmi hna zong an check hna lo. Hi a checknak hi a tlawmbik te tikah a fiang cangmi lawng zohkhenhnak ding Prove tuahnak ding caah an checkmi hna a si. Cucu mi zahpi nih kan i fian ahau. Cu hnuah an check i result a lang colh lo. Va ṭin law nithum/li hnuah a result kan in chimhte lai an ka ti. Inn ah vun ka ṭin i ka um. Result a langh rih lo tikah ka si lo kho men tiah sii cu ka din piak rih. Sii ka din deuhdeuh ka thazaang tlum deuhdeuh ka thawchuah a har thluahmah ka keng le ka ṭanglei zong fah hram a hun i thawk i ka celh ti lo. Nithum hnu ah phone an ka chawnh sizunglei ah rak ra ṭhan ta an kan ti i sizungah Positive na si ko an ka ti hi a si,” tiah a chim. A chimmi tampi caah a tangleiah video kan chiah i tlamtling tein ngawih khawh rak i zuam hram! Video timi rak hmeh law a video a um lai.