US Covid-19 Update: 04/13/2020. US mipi nih social distancing tha tein an zulh caah a zawmi le a thimi cazin zoh chih in peak date kha an thlen ve i, kan hnu Friday kha a sang bikmi peak date a si. Tuzarh cun a thimi a zaw tharmi la zor lei an pamh lai tiah ruah a si. Tuchun tiangah US ah a thimi minung 22115 an phan. Nizan ah a thimi minung 1811 lawng an si cang. A zawmi 560433 an phan. Nizan lawngah a zawmi minung 34874 an i chap nain Friday he epchunh ahcun a zawmi cazin a zor. Tutiang ah zawtnak a chek cangmi hi 2 million renglo an si cang. Zawtnak chekmi an tam caah a zawmi cazin a karh kho ti a si. A dam than cangmi 32634 an si. Nizan lawgah a dam thanmi minung 3879 renglo an i chap ve. A thi mi a tam deuh cu minak pawl an si. A pahnihnak ah mirang, a pathumnak ah miphundang an si. A thimi tam deuh hi zawtnak dang a ngeih chihmi mi tam deuh an si.

White House Coroanvirus Task Force chungtel Fauci cu a bia hnu le hmai a kalh deuh ti a s. February ni 29 ah a rak chimmi cu mah zawtnak hi phan ding a si lo. US mipi caah tihnung a si lo” tiah a rak chim. Asinain nizan ah CNN he interview ah a chim thanmi cu tuante in social distancing rak tuah usih law kan rak him deuh lai tiah a chim than. Friday i Press Conference an tuahnak ah May thla ni 1 thawk in US business pawl kan on than khawh men lai tiah an chim. Asinain President Trump nih zawtnak lei thiamsang hna nih ruahnak pekmi chung in biachahnak ka tuah te lai a ti. Mah biachahnak ka tuah dingmi hi ka chan chungah a har bikmi biachahnak a si lai a ti.

Cozah nih Coronavirus bawmhnak a tuahmi, minung pakhat ah $1200 le fa pakhat ah $500 chap dingmi bawmhnak cu kan hnu friday khan deposit in kuat hram an thawk cang. Tuzarh chung ahcun mi cheukhat nan bank account ah a lut cang lai tiah zumh a si. Asinain mail in kuat dingmi pawl cu April 24 hnu lawngah kuat khawh an si lai tiah an chim. White house coronavirus task force nih an tuakning ah August thla ni 4 tiang ah khin, a thimi dihlak minung 81,766 kan phan kho tiah an ruahdamh. Tuan deuh i an tuakning ahcun minung 100000 in 240000 tiang kan thi kho tiah an rak chim.

President Trump nih small business pawl bawmhnak caah US$250 billion bawmhnak tuah an duh nain Democrats pawl nih small business bawmhnak he a pehtlai lomi, sizung, sibaw, nurse le food stamp lei ah bawmhnak tam deuh in telh chih an duh caah kap hnih lungtlinnak a ngei kho lo. Republican pawl nih bill kan chuahpi mi hi small business caah adang tein tuahmi bawmhnak a si caah a dang bawmhnak he kan cawhmeh kho lo an ti.

Vawleicung ah zawtnak ngeimi tam bik cu le a thimi tam bik cu US kan si cang A zual bikmi khua cu New York a si i, minung 9385 an thi. Nizan lawngah New York khua ah minung 715 an thi. A ttum lei a pamh cang. Atu lio ahcun sibawi, nurse le healthcare riantuantu pawl cu ralkap nak in bochan deuhmi an si. US mipi himnak caah ral a tumi an si. US rampi chung a zawmi le a thimi, 40% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti. Covid-19 ruangah US ah rian ngei lo a sawkmi million 17 renglo an si cang. Credit: Salai Lairamthang