By Luther Tin Hre

US Buainak Kong Le Trump Dirhmun Tlawmpal: Presidential thimnak a nai chin lengmang. President Trump cu Democrats lei pawl nih a lam kip in thlak khawhnak lam an kawl chin lengmang. Corona virus ruangah poll ah kal loin mail tu in vote kan thlak cang lai tiah Democrats pawl nih an phuan.

House Democrats pawl nih mail kuatnak caah $25 billion hman ding in an suaisam. Asinain President Trump nih a duh lo tuk. Mail in vote kan thlak ahcun lih le hrok a tam tuk lai a ti. A duh lonak cu Twitter ah a tial i Twitter nih “mail in vote thlaknak ah lih le hrokhrok a um bal maw”? tiah fact-check an tuahpiak.

A fact check tuahpiakmi nih President Trump thin a hunter ngaingai. Duh poah in Freedom of Speech kan ngeihmi a kan hnursuan awk a si lo. Ri ngei loin facebook le Twitter pawl nawlngeihnak hi kan thumhpiak hna lai tiah a hrocer hna. An nih cu publisher si loin media platform lawng an si caah an duh paoh in a hmangtu hna tuahto hi a tha lo a ti.

Section 230 of the U.S. Communications Decency Act hi Social media platfform pawl hna caah phaw bantuk a si. A runven tuk hna caah an duh paoh in a hmangtu catialmi an delete piak hna, an edit piak hna, an thuhpiak hna.

Cucaah an duh poah in Media platform hmangtu tuah kho ti hna lo ding in lam kan kawl lai tiah an zoh cuahmah lio a si. A hleiin Twitter hi Liberal hoih in a ummi an si i Conservative view a rem lo ngaimi an si. A hleiin Fact check tuah leiah tuanvo ngeitu pa Trump le Republican upa a rem lo ngaimi hna a si.

US tuanbia ah Mail in vote thlak hi mi zeimawzat caah cun an tuah pah lengmangmi a si ko nain tutan ah ram pumpi huap in an tuah ahcun lih le hrokhrol cu a tam ngamsam lai ti a fiang cang. An tuah cianak ah lih le hrokhrol a um ngai cang. Hihi Democrats pawl nih lih le hrokhrol pah in Trump teinak caah lam pakhat an i ruahchanmi pakhat a si lai tiah an zumh.

A ra thanmi cu minak pa an thahmi kong zong a si than. Vun raang pa kha a palh ko, asinain daite in sandahpiahtu hna kha Antifa bu pawl nih an luh hnawh hna i, an duhmi target tu langhter loin Antifa bu duhnak tu ah an mongh hna. A hnuah cun meikhangh, fir, hramh le thah le nawnnak in buainak an ser.

Lungfim minak tampi nih cun an kir tak than hna. Kan i tinhmi a si lo an ti. Mi thi pa chungkhar lila zong nih hi bantuk cawlcangh hi kan duhmi le kan i tinhmi a si lo tiah an thanh. Minak nu pakhat hna nih cun ‘black lives matter tiah nan i auhtermi hi nihchuak nan si. Chicago ah minak pawl nifatin in an i thah lengmang. Zeiruangah dah Chicago ah nan au lo. Atu lawng ah nan au?” tiah fak taktak in a phomh chih hna.

America ah Antifa cawlcanghnak hi 2017 hrawng in biatak in a linsa than. White Supremacists or right-wing extremists pawl cawlcanghnak lehrul in biatak in a tho vemi an si. Nazi party kha fak piin rak doh hna u sih law nawlngeihnak an rak tlai kho hnga lo tiah a thar in hraan le sual aa timmi an si.

An cawlcanghning zoh hna tikah nu zong pa zong an tukvelh hna. An cawlcangh a zoh hna lengmang tikah US minak pa Kim Jung-un hawipa hna nih cun ‘saram’ an si a ti hna. A hrawh khawhmi paoh hrawh an i zuam; an fir khawhmi paoh fir dih an duh; zeitluk fak in dah buainak kan ser khawh lai ti kha an duhmi a si zungzal.

Zeitluk in dah an i tinhmi a pial ti ahcun minak phuhlam an duh i, miphun thleidannak lohter taktak an duh ahcun uktu hna sinah an auh khawh chungin au ding a si. Asinain daite in sandah a piah komi hna kha States dangdang in an rak luh hnawh hna i a tlawmpal ahcun zei he hmanh in aa tlai lomi mi sawhsawh hna inn, dawr le thilri vialte an hrawh tluahmah dih.

President Trump nih a zoh ko hna i an luan tuk cang timi a hmuh hna tikah States Terror an si tiah a phomh colh hna. States Govenor hna sinah Trump nih a timi hna cu “nan cil hna lo ahcun an in cil dih cang hna hih” tiah fak taktak in a sik hna, zeicatiah an cawlcangh kha zeitluk ti toih zong ah a za cang ti a thei lomi thise ramcar bantuk an si.

Ciam cikcek in khua le ram an chiah dih hnu hmanh ah a za cang ti a thei lo ding minung an si. President Trump nih biachimnak a vun tuah ah khan fiang tein a chim. An hrawhhralpiakmi hna dirhmun a fiang ngaingai. Fir le hramh a tongmi ‘kan in bawmh hna lai’ tiah thazaang a pek hna.

A peh rihmi cu “kan ralkap zong ka hman hna lai” a ti. Mi cheukhat nih President Trump an soisel len. Trump nih zeitluk tiang dah buainak donghternak caah ka cawlcang lai timi hi aa fiang tuk. A nemnak in biachim le hnemh hna kha aa timhmi a si lo. A zatawk in a tuarmi chungkhar sinah hnemhnak a chim cang. Zeitluk tiang dah zalong tein sandah kan piah khawh timi voitam tuk a chim cang.

Zeitluk in dah a free mi ram an si kha mipi theih in a langhter cang. Asinain hi tiang lawng a za lo ti zong a fiang tuk. Tutan buainak ah hin Antifa bu le an hnuzultu hna lawng an si lo zia kha a fiang tuk. President hlun Barack Obama zong an hnulei in aa tel; Pi Clinton zong aa tel; Democrats upa tam tuk an i tel. Zeitluk in dah President Trump kan buai lai i harsatnak kan pek khawh lai tiah fak piin an i zuam.

Hnahnawhnak pek tiang lawn si loin November thimnak tiang ah ceilak in tengh an duh. Cucaah President Trump nih ‘fir le hramh’ in buainak a ser komi hna sinah khan politically correct ngaiin remhnak kan ser hna lai ti ding kha a lam zong a si lo; a herhmi zong a si lo. Obama hi nautat awk tlak ngai a sinak cu a ka a pau paoh ah mipi thuksawhnak a chim peng lai. Trump min telh loin a seh peng fawn lai.

Tutan a statement chuahmi hna kha ram daw taktakmi hmurka le catial a si lo. Minak civil right leader Martin Luther King he cun van le vawlei in an i hlat. Minak pawl a pilpitu hna chin lengmang tu a si. Zeitluk in dah minak le vunrang an i neih lai tiah aa zuammi tu si loin zeitluk in dah an i hlat chin lengmang lai tiah aa zuammi tu a lo. An hmaa an khoihpiak lengmang. Mah tluk in buainak an ser, an fir; an hram lioah ‘mi tlawmte lawng nih buainak an ser’ a ti. ‘Thlennak taktak chuah pi kan duh ahcun politics lawng a za lo; protest lawng a za lo; a pahnih in kan tuah hau’ tiah a tial chih.

Khatlei in States Governor pawl cawlcangh zoh tikah san an tlaih loning a lang tuk. President Trump nih atu le atu ti awk in a aukuanh lengmang hna bu zong in an taw a rit peng. Trump nih direct in chawhkenh hna in tlangtlak khanh awk an tha lo. An State cio cungah nawlngeitu an si ve tikah zoh hmasa lengmang an hau. Mah tluk in inn le dawr an hrawh, an fir, an khangh; nu zong an velh hna; pa zong an velh hna. Cu bu zong cun cawlcangh awk an thei lo.

Kanmah kan him paoh cun a za tiah ruahnak an ngei lo. An hna an i chehter. Trump nih zeitluk in dah resources tha kan ngeih; hmang u tiah a chimh lengmang hna bu zong in an hnachet kho peng. An santlaih lo tuk bia maw a si; zeitluk in dah Trump hi zohchia in kan tuah lai ti an bawh dah a si hnga!

Trump lehlam tu an doh i an soisel. New York Governor Andrew Cuomo hna nih cun “dai tein sandah a piah komi hna US miphun cungah ralkap hman aa tim. Ningzah a si” tiah a soisel len. Zeidah a cang ti zong zeihmanh thei hlah seh law a lo ngai. Daite in sandahpiahmi cungah Trump nih ralkap hmanh aa tim hna lo. Andrew Cuomo hi Corona virus kongah san a tlai lo tuk i New York nursing Home ah thihnak a khahter i, runvenak zong ah zeidah, zezat dah kan herh tawk a si ti zong a thei lo an timi pa a si. A naupa hi CNN ah a um.

A donghnak an soisel len thanmi cu Inn Raang pawng i Biakinn an khanghmi a va lennak kong kha a si. Biakinn riantuantu upa lila zong nih Trump an soisel. “Kanmah theih loin a rak ra; cun mipi lemsoi duh a si” tiah riantuan upa pakhat nih a chim. Biaknak riantuantu upa zong hi dirhmun ngei lem loin thli a hrannak paoh ah choihmi an rak tam ko.

A si ngai hnga maw? Mah tluk a him lo lio i a inn pa te zong a si i, Inn Raang he tuanbia chan tampi chung a ngeimi cangmi a kangh lio i a va lenmi cu upat tlak ngai a si tiah ka ruah. Trump hrimhrim nih a hmurka in ‘historic building’ a ti. Bible aa tlaih i mipi zong a hmuhter len hna. Inn a kangh zong ah Bible kan ngei ko. Ruahchannak a um ko ti hi Trump nih a langhter duhmi a si lai tiah ka zumh.

Ka bia lakah Trump nih upa lianlian dangdang aa zulhter hna lo. US Department of Justice leiin Attorney General William Barr lawng upa lian cem ah aa zulhter. Sullam a ngei kho men. Biatak tein buainak sertu pawl hi hmaa an lakpiak hna lai tiah ka zumh.

A zumhnak kongah atu tiang an soisel lengmang fawn. Asinain a zumhnak kongah a lungfim ngaingai ti voitam ngai ka hmuh cang. Biaknak a upat i Pathiam zong a zumh ko ti hi a nunnak ah ka hmuh lengmang cang. Ka uar ngaimi cu tu kum Easter zarh chungah khan Taluk le WHO kongah khan buai cio a si. WHO cawlcangh nih Trump thin a rak hunter ngaingai.

Media pawl nih WHO kongah bia tampi an hal. Easter (Bawipa thawhthan) zarh a si caah Trump WHO cungah bia fak pakhat hmanh a rak chim lo. A lehmi hna cu “Easter week a si caah zeihmanh ka chim rih lai lo; next week leiah WHO kongah thawng ka thanh te lai” tiah a rak leh hna. A next week ah WHO bawmhnak pek tawnmi ngol chung ding in a thanh taktak. Zahan zarh khan cun WHO he pehtlaihnak tiang a donghter cang.

Kahin chim duhmi cu Biaknak thil or Pathian lei he aa pehtlaimi paoh ah upatnak a langhter lengmang. Hihi Khrihfa tha timi tampi hmanh nih thleidan an thiam tawn lomi a si. Cucaah President Trump nih biaknak a dirpi taktak maw timi ah hin Khrihfami hna mithmai hmuh duh sawhsawh ah a deu in a dirpimi si seh law a cawlcanghnak mit a rem lomi a tam ngai cang lai.

Asinain atu tiang i Biaknak lei he aa pehtlaihnak cawlcangh zoh tikah a lungchun taktak in Pathian a thei ko timi hmuh khawh a si.

A donghnak ah, November thimnak ah mipi tampi nih Trump caah lungretheihnak an ngeihpiak cang a timi zong an um. Corona virus in tutan buainak tiang an vun i pehtlaih tikah aho paoh nih Trump zoh cio a si. Hi tluk lio caan celngel ah Joe Biden he an i tong i Trump caah vanthat ngai zong a si. Joe Biden cu Democrats upa tampi hmanh nih an uar lo tuk. American mipi chinchin cu chim ding a um lo. Aa tinh lomi ah zeitin dek Presidential candidate caah an paihhrolh sual i, atu tiang a taang kho i a si.

A biachim zoh ti ciocio; an riantuannak nehnang zoh ti cio zong ah Joe Biden cu US President ding ah aa tlak lo tuk. Presdent Trump kha aa tlak lo an rak ti i, Joe Biden aa tlak loning in a let tam tuk a zualhma. Buainak le lih le hrokhrol in vote thlaknak a um lo ahcun President Trump nih a nolh than te ko lai ti hi catialtu zumhning a si. Miraang pawl nih Trump an uarning cu US tuanbia a um theng rih lai lo.