US Ah Laimi Pafa Hna Nam In A Sawhtu Cu Kum 25 Thongdan An Pek: Kum 2020, March thla lio ah Laimi pafa hna nam in a sawhtu Jose Gomez III (kum 21) cu US biaceihzung nih August 4, cawn nili ah dantatnak an pekmi a thanh.

Pu Bawi Cung Nung le a fale pahnih cu US ram Texas ramkulh Midland khua, Sam’s Club dawr i an kal lio ah Spanish pa Jose Gomez nih nam in a rak sawhmi hna an si. Jose Gomez nih cun Covid zawtnak a chuahtertu Tuluk miphun ah ka ruah hna caah ka sawhmi hna a si, tiah biaceihzung ah a chim.

Hi caan hi Covid zawtnak a chuahka a si caah Asian mi le a bik in Tuluk miphun cu huat le ral an ton tuk lio a si. Cucaah Pu Bawi Cung le a fapa zong hi sualnak le palhnak zeihmanh an ngei lo nain namsawh tiang an tuarnak a si.

Pu Bawi Cung Nung le a fapa nam in sawh an ton hi 2020, March 14, zanlei 7:32pm ah a si. Nam sawh an ton lecangka in an pawngkam ummi Mirang pa nih a zuanhnawh hna i amah zong hliam a tuar. An pafa in an hmai ah a sawh hna i a fapa Robert hi fak tuk in a hliamh. An pahnih in siizung ah an tlikpi colh hna. Ni zeimawzat siizung an um hnuah dam tein an chuak ṭhan.

A sawhtu Jose Gomez hi a sawh hna lio ah kum 19 a si, kumhnih a rauh hnuah biaceihzung nih kum 25 thongdan an pek hi a si. Pu Bawi Cung Nung hi Midland Chin Immanuel Baptist Church chungtel a si i, Kum 2014 ah US a phanmi an si. Pathian a duh ngaimi a si, tiah theih a si. Laitlang lei a khua cu Thantlang peng Thau khua a si nain Kalaymyo ah a ummi an si. Credit: The Chin Post