US ram ah novel coronavirus a karhning hi Europe ram Spain nak in a lathnih bak a si i hi zawtnak ai thoknak ram China nak in a letnga bak a si cang tiah an chim. Buaktlak in an tuakning in Spain ah a zawmi minung 7000, Italy le UK ah 5000 nak tlawmdeuh le Iran ah minung 1000 hrawng an si lio ah America ah cun minung 20,000 bak an phan tiah an chim.

A tu tiang ah hin US ramchung ah hi zawtnak a ngei bakmi tiah theihmi hi minung 245,000 renglo an si cang. Hihi US chimlo in hi zawtnak a tam biknak ram Spain i a lethnih renglo bak a si. Spain ah hin hi zawtnak a ngeimi hi minung 117,000 bak an tling ve cang tiah an chim chih.

Cu caah vawleicung pumpi huap in tuak tik ah US hi coronavirus a tam biknak le hi kong ah lungretheibik a simi ram an si. US a vang chantu hna cu Spain, China, Italy, UK le Iran ram pawl hna hi an si. A sinain Asia ram pawl nih cun nikhat ah zawtnak a karhning hi minung 3800 hrawng nak tam in an chim bal loh.

America ram ah cun nizan lawng hmanh ah cun ni zawtnak in a zaw tharmi hi minung 28,990 bak an tling ti a si. Cacawn nilini ah khan nawlngeitu hna nih an thanhmi cu kha nikhat chung lawng bak ah khan minung 1000 nih an thihpi. Hihi a tu tiang ah cun hi zawtnak in nikhat chung ah a thimi an tambik a si tiah an chim chih.

US ramchung zong ah hin New York City hi zawtnak a tam biknak hmun a si. Cacawn nilini ah khan coronavirus a ngeimi minung 2,373 an tling cang ti a si. Cu lio ah Spain ram pumpi ah cun minung 2,770 an si tiah nizan ah khan an thanh.

Khatlei kam in an chim vemi pakhat cu hi bantuk in US le New York state ah zawtnak a tam tiah kan timi hi zawtnak a ngei maw ngeilo ti hneksak cangmi an tam ve ruang ah a si. US ramchung minung dihlak zatuak 25 (25 percent) cu zawtnak an ngeih le ngeihlo hneksak an si cang tiah an chim chih. Ref: Dailymail