Falam-January 12 zinglei suimilaam 4:10 hrawngah Falam Lamtonnak ah inn 6 a kaang i kumkhua upa tarnu pahnih a kanghchih hna, tiah theih a si. A nunnak a liammi hna hi Sayama Mang Hlei Zing le Pi Rah Zing hna an si tiah thawng kan theih.

Atu bantukin inn kanghnak a ruang an hlat tikah, ihkhun pawngah an chiahmi Electric heater a sat tuk ruangah meikanghnak a chuahnak a hi a si tiah Falam palek sinin theih a si. Atu bantukin ngaihchiatnak kan ton hi cu lung a fak tuk hringhran. Lung a nuam hrimhrim lo.

Inn kang hi zinglei suimilam 5:30Am hrawngah mipi le meithattu hna ibawmchan in mei cu an hmih khawh nain, inn 6 a kangh manh dih. A kaangmi inn 6 hna cu;

Pu Kiam Si inn
Pu Zaw Tun inn
Pi Mang Hlei Zing inn
Nu Pen inn
Pu Biak Vum
Sm Thiam te inn pawl an si.

Cun, Pu Tawi inn, Pu Khaw Lian Pum dawr le u Ciin inn zong an kang sual lai tiin an ṭheh hna tiah theih a si.

Falam ah inn 6 a kaang, tarnu pahnih an thi, thilri sing 80 leng man a ciam. Falam khua, January 12 zinglei suimilaam 4:10 hrawng ah Falam Lamtonnak ah inn 6 a kaang i kumkhua upa tarnu pahnih a kanghchih hna, thilri sing 850,000 man hrawng a ciam, tiah kan theih.

“Ahote inn in dah inn kangh aa thok ti le minung zeizat set dah an thi ti hi kan hlat lio a si. Atu tiang ahcun kum 69 nu, Pastor zong a rak tuan bal mi le hnachet mi nu pakhat a kanghchih hna. Zeitin mei aa thok i a kangh ti hi kan hlat lio a si. Zinglei 4:10 hrawng ah a kaang i 5:30 hrawng ah mei kan thah khawh. Thilri a ciam mi hi kanmah nih kan tuak ning ahcun tangka sing 850,000 man hrawng a si,” tiah Falam Pengkomh (Khayaing) lutlai Pu Ca Zung Mang nih The Hakha Times ah a chim.

Hi kong ah Falam Peng Meithat Zung lutlai phone kan chawnh nain damlonak ruang ah sii-inn ah a um lio a si i kan pehtlai kho lo.

“Chin Ramkulh Cozah lei nih kan tikhwahtawk in inn kaang mi in 6 siseh, mithit siseh, tangka Ks. 300,000 cio ka va bawmh hna,” tiah The Hakha Times ah a chim. 2021 kum January thla chung ah atu hi a voi hnihnak inn kangh a can hi a si. Hakha Khuathar zong ah 2021 January 9, zaan 11:00 hrawng ah inn 3 a kaang i Seven Star kedan dawr ngeitu U Than Wai zong a kanghchih tiah, tiah kan theih. Source: The Hakha Times

_____

Copyright © Chin World News Evening