The Chin Post: Chin ramkulh Thantlang khuachung ah nihin September 9 suimilam 1:00 hrawng in kahdohnak a chuak, ralhrang phu hna nih khuachung ah hriamhme he hriamngan he hmang in an kah hna caah khuachung in hliamh mi an um, cun inn lo zong a hrawh len tiah theih a si.

Ralhrang phu lei in a tlawmbik minung 2 hrawng cu an thi lai tiah khuami pakhat nih a chim.
Puahkeh a chuahnak hmun hi TBC Biakinn hmai le Market hmai le Market thlang lei hna an si, hmuntampi ah puahkehnak thawng cu kan theih tiah khuami pakhat nih a chim.

Thawngpang dang: Kayin ralkap KNU le ralhrang phu kar kahdohnak kong KNU nih ralhrang phu umnak sakhan an lak khawh tiah thawng theih tik ah online cung ah rianrang in tarlangh lo ding theihter nak cathanh cu KNU nih nihin ah a chuah.

“Hmunkhat ah tan pi ding in nawlnak” tiah tlangtar in theihternak cathanh an chuah mi ah kahdohnak le cawlcanghnak thawng cu online cung ah rianrang in thlah a si ah cun, kan ral hna sin ah thawngthanh cia le theihter cia bantuk a si caah ral kan doh cawlcanghnak ah KNU nih a tuah ding mi timhtuahnak vialte hnahnawhnak a pek khawh tiah an langhter.

“Tuahkel ahcun KNU le ralhrang phu kar kahdohnak a chuah hnu ah ralhrang phu hna nih vanlawng he bomb thlak hnawh in kah nak le anmah ralhrang phu bawmtu minung an thlah tawn. Cu ruang ah KNU nih chungtel ralkap vialte kahdohnak a dih hnu a humhimnak hmun an phanh than tik lawng ah online cung thawngzamh ding in kan in nawl hna” tiah an langhter. The Irrawaddy