SAC Ralkap Vanlawng Bomb Thlaknak Ruang Ah Khuafo Khuami 10 An Thi, 20 Hliam An Tuar! Chin ramkulh, Thantlang peng, Khuafo khuachung ah SAC ralkap vanlawng nih kahdohnak zeihmanh um loin le a ruang um loin bomb a thlak ruangah khuami 10 an thi i Lungzarh khuami 2 telh in 20 hliam an tuar. Bomb thlak ruangah nunnak a liam mi le hliam tuarmi hna lak ah hin nu le ngakchia zong an i tel, tiah theih a si.

Tualchung mi hna chim ning ah, nihin March ni 30 zinglei suimilam 10:30 hrawng ah khan Thantlang peng, Khuafo khuachung ah kahdohnak um loin SAC ralkap nih vanlawng in bomb a thlak ruangah khuami 8 cu lorian an ṭuannak Aithing hmun ah an thi, tiah theih a si.

Thawngpang hmanung bik kan theih ning ah mithi zat hi 10 an si i, a thimi lak ah hin nu le ngakchia an i tel. hliamtuar mi zong minung 20 leng an phan. Hinak in a thi mi le hliam tuar mi an tam deuh kho tiah, hliamtuar mi bawmchantu hna sinin theih a si.

Khuafo hi Thantlang he meng 5 tluk aa hlatmi khua a si. SAC ralkap nih vanlawng in bomb a thlakmi hmual a fah caah inn zeimawzat zong an kaang i an rawk tiah theih a si. CHRO nih an rak thanh ning ah tukum 2023 February thla tiang ah khan Chinram peng 4 ah SAC nih vanlawng in voi 53 a kah i, bomb voi 138 a thlak, tiah theih a si. Source: The Chin Post

Ralvengtu SAC Ralkap Le Pyusawhti Bomb Puahhnawhnak In 3 An Thi, 6 Hliamhma An Pu. Sagaing ramṭhen, Pale peng Inmahti khua pyusawhti sakhan ah a ummi SAC ralkap le pyusawhti cu March ni 26 zing suimilam 10:00AM ah bomb in kan puahhnawh hna caah 3 an thi i, 6 hliamhma an pu, tiah Tiger PDF nih March ni 29 ah cathanh an chuah.

Pyusawhti sakhan pawngkam ah ralvengtu SAC ralkap le pyusawhti cu Inmahti khua pawng ah PDF nih kan hmanhmi bomb in a puah hna, tiah PDF hruaitu pakhat nih a chim.

“Royal Eagle nih Inmahti khua in nitlak chaklei ah an hmanhmi bomb nih a puahhnawh hna caah SAC ralkap 1 le pyusawhti 2 an thi i 6 hliamhma an pu,” tiah PDF ṭuanvo ngeitu nih cun a chim.

Cu kahdohnak ah Yinmarbin pengkomh Battalion 7, Pale peng Battalion 1, Rohal Eagle Company 2, Pungtaung Tiger PDF hna i bawm in an puahhnawh hna, tiah theih a si.Source: The Chin Post

S. Lungpher YLA Nih Ralzam Renghnak Phung An Ser! Bianolh A Um Hlan Cu Ralzam Luhchuah An Kham Rih!

India-Myanmar ramri ah a thimi Pu B. Lalṭhafamkima chuahnak khua, South Lungpher Branch YLA nih cun S. Lungpher khua i a ummi ralzam hna caah phungphai thar an ser i, bianolh a um hlan cu khuadang in Lungpher khua ah ralzaam luh an kham, tiah theih a si.

S. Lungpher khuatlang hruaitu pakhat nih cun, “Kan pengtlang YLA hruaitu(Bualpui Sub-HQ) hna cathanh pehzulh in atu bantuk in ralzam hna ca ah phungphai kan ser mi hi a si. Zeitik tiang dah kan pehzulh lai ti cu chim khawh a si rih lo, kan umtu ning kan zoh lai i, a caan a za cang kan ti tik ah kan phoih ṭhan te lai,” tiah The Chin Post ah a chim.

Ralzam hna zulh ding phung an ser mi cu a tanglei bantuk hin a si. 1. Atu thawkin bianolh a um hlan cu S. Lungpher khua ah, zaan riak ding in maw thildang ruang zong ah khuadang in ralzam luh sian a si lo.

2. 125 bike hrimhrim khuadang in luhchuah sian a si lo. Khuachung i a um mi 125 bike zong chawhvah sian a si lo.

3. Khuatlang hruaitu VC le YLA theihpinak tel loin khuachung i a ummi ralzam hna cu khualtlawng le a lutchuakmi kan um ahcun a herh ning in ṭuanvo kan lak lai. Hi phungphai hi khuachung i a ummi ralzam vialte nih zulh ding in kan in theihter hna, tiah YLA S. Lungpher Branch nih cun nizan March 29 ah cathanh an chuah. Source: The Chin post