Covid-19 zulhphung a buar tiah an thong an thlakmi thawngṭha chimtu Rev. David Lah cu Yangon Insein thonginn in Hniang 14|07|2020 ah chuah ter a si tiah kan theih. Voi tampi a bia an ceihpiak hnuah thlathum chung thongtla dingin bia an khiah piak i thonginn an chiah chung an rel tikah zarhnih a tang hnuah an chuah hi a si.

Rev. David Lah cu ramdang ummi a si caah thonginn in chuahter a si hnuah a umnak ram Canada kir ter a si. Rev. Davih Lah kong ah mi tampi nih anmah ruahnak hmuhning tampi an chim cio. Cheukhat nih cun sualnak pakhat a ngei lo tiin a rak dirkamhtu zong an rak um ve.

Chinmi nih kan ibochan ngaimi Dr.Sasa zong nih Rev. David Lah cu misual lainawng bangin a kut citcin an khihmi kong he pehtlai in a lungfahnak le kawl media pawl nih zulhphung an buar ve nak kong amah pumpak facebook ah a rak tarlangh ve. Asinain Pathian umpi thawngin a tu ahcun Canada ram zong tluang tein a phan cang tiah kan theih.

Thawngpang ṭha ngaingai a ummi cu Rev. David Lah nih thong an thlaknak Yangon Insein thonginn caah tiin tithiang chiahnak (filter)tuahnak caah ting 200000MMk a lut hna tiah Insein thonginn i ṭuanriantu le Yangon ramkulh hruaitu a simi Dr.Charity Htoo nih Vapual Auaw sinah a chim tiah kan theih.

Rev. Davih Lah nih a hlutmi ti thianghlim chiahnak caah a hlutmi hna cu thongtla pawl nih ti thianghlim an hmuh i an din khawhnak ding caah a tu bantukin dawtnak le zuanruahnak nganpi he a hlut hna hi a si. Upat awk tlak le zohchun awk tlak taktak a si. Charhchan: Vapual Auaw