United States Le Canada Nih A Fekmi Biakamnak A Thar In An Tuah Ṭhan 

Thawngpang

US le Canada nih coronavirus kong he pehtlai in a fekmi biakamnak thar an tuah tthan cang. Canada Prime Minister Justin Trudeau nih a chimmi cu US he hnatlaknak kan tuah tthan cang. Cucu US le Canada ramri hna cu ni 30 chung khaar rih ding a si lai.

Coronavirus: Trump orders 'time-wasting' General Motors to make ...

Hi ramri khaar chung ah hin a herh tuk lomi thil pawl paohpaoh cu a ho hmanh luhchuahter an si lai lo. Hnatlaknak kan tuahmi hi tuan deuh ah kan tuahmi bantuk tthiam kha a si ko. Ni 30 chung kan sauh bia khi a si. Hi chung ah hin a herh tukmi pawl cu luhchuahpi an si tthiam ko lai tiah Trudeau nih rinni ah khan a chim.

PM Trudeau nih a chim rihmi cu hihi coronavirus ruang ah thinphan thlalau in kan um cuahmah lio ah kaphnih caah a himmi le a tthahnemmi a si. Hi bantuk in ramri in luhchuahnak pawl hna hi a ra laimi zarh tampi chung cu khoika lei paoh felfai taktak in zohkhenh le kilven an si lai tiah a chim chih.

Kan hnu cacawn nithumni ah kha US President Donald Trump nih US le Canada ramri hna hi hun tthan hmasa bikmi an si lai. US le Canada hna hi hi zawtnak in i runvennak le i thlawpbulnak ah kan cawlcangh a ttha ngaingai tiah a rak chim. US hi vawleicung ram ah COVID-19 a ngeimi an tam biknak ram a si peng ko rih.

US le Canada hi kan hnu thla ah khan ramri khaarnak kong ah hin hnatlaknak an rak ngei. A herh taktakmi thil kong lawng ah luhchuah ding ti a rak si. A sinain cu an hnatlaknak cu a ra laimi zarh ah hin a dih ding a si caah a tu bantuk in hnatlaknak thar an tuah tthan hi a si. Cu hlan thawngpang a tthat lio ah cun US le Canada ramri in a luatchuakmi hna hi nikhat ah minung 200,000 hrawng lengmang an si. US le Canada hi vawleicung ah ramkhat le ramkhat karlak ramri a sau bikmi an si. Canada nih hin an thilchuak chung in 75% hi US le ah an kuat hna i American thilchuak 18% hrawng hi Canada lei ah kuat a si ve.

Canada ah coronavirus a ngeimi mi tampi hna hi US lei in a rak kirmi an si caah Trudeau hi Trump nih zei timaw in a rak ti lai le ramri a hun sual lai tiah Canada mipi an thin a phang ngaingai. Kan mipi himnak ding le mipi hna nih an herhmi thilri an hmuh khawhnak ding a si khawh chung in kan i zuam peng ko lai tiah Trudeau nih a chim.

Ramri in a lutchuak kho dingmi hna cu ngandamnak kong he ai pehtlaimi thilri pawl. Cu bantuk a luhchuah pitu vanzuanglawng le thilphur mawtaw pawl hna le eidin ding ti le rawl pawl hna an si. Canada rawl hi a tampi cu US lei in a lutmi an si. Canada ramchung ah hin coronavirus a ngei cangmi minung 31,884 renglo an si cang i cu chung ah cun minung 1,308 renglo nih an thihpi cang. Ramchung ah minung 507,000 hna cu zawtnak an ngeih le ngeihlo hneksak an si cang tiah an chim. Ref: ABC News

Leave a Reply