Ummi Caah Thawngpang Ṭha: $120,000 Tiang Lahkhah A Hmumi Innchung Khar Fa Le Caah College Tuition A Lak (free) A Si Lai
THAWNGPANG TTHA TAKTAK JOE BIDEN NIH A PHUAN (Apeh-2). Friday, April 10, 2020 ah “THAWNGPANG TTHA TAKTAK JOE BIDEN NIH A PHUAN” tiah ka ttial. Thawngpangttha ah ka ruat taktak ko. Education policy a ttha. Comments tampi nan ttial. Ka lawm. Kan ruahnak aa dang kho. A poi lo. Amahbelte, agenda leng chuak hram hlah usih. Khrihfa upa meeting kan tuah. Agenda leng a chuakmi upa an um sual tikah meeting a tluang lo. Hihi philh hlah usih. Kan nawl hmasa hna.
Bernie Sanders aa din hnu cun Democrats leiin Joe Biden lawng a tang cang. Pres.Trump he an i cuh te lai, Nov. 3 ah. Kumkhat ah $120,000 tiang lahkhah a eimi innchungkhar fa le caah college tuition a lak (free) a si lai tiah Biden nih a ti. Hihi American mipi caah a ttha tuk. 45 million reng lo Americans nih student loans an ngei. Hodah an si hnga! Sianginn ttha kai kan duh cio. Tuition fees a fak tuk fawn. Khua a sa khomi caah cun a poi lo.
Micheukhat kan caah cun cozah bawmhnak um locun van zoh ah a sang. Kan fa le ca an i zuam, an thiam tuk ve ko lai. Nain, bawmhnak a tam lo ahcun vawlei zoh ah a pit. Leiba tam kan ttih. Kan mawh lo. Hihi US khuasa Chinmi nih kan ton cuahmah cang. Hmailei zong kan hrial kho lai lo, kanmah chaan ahcun. Kanmah lawng kan si lo. Kanmah bantuk an tam tuk ve. Cucaah education issue hi a biapi ngai. Zeicahtiah U.S. ah mingei le mingeilo kar a hlat taktak.
President thim tikah ISSUES an zoh. Education lawng a si lo. Issues dang an tampi. Tahchunhnak ah economy, foreign, healthcare, immigration and border security, national security, environment, gun control le abortion, etc. Duhmi aa khat cio lai lo. Hispanish/Latino voters caah cun immigration le minimum wage a si kho. Asian American caah healthcare a si kho. Mah le duhmi issues kalpi aa timi presidential candidate kha thimfung an thlak cio te lai, battleground states hna nih.
Education issue ah Biden policy hi A+ ka pek. Pres.Trump education policy fiang deuh in theih ka duh rih. Presidential debates (Sept. 29, Oct. 15 le Oct. 22) tikah a fiang chinchin lai ka zumh. Zumtu mit zongin Biden education policy ka zoh. Samaria Mittha pa (Good Samaritan) policy ka ti. Pro-life policy ka ti fawn. (kei cu President thim tikah Character le Policy ka zoh lai). Credit: Zo Tum Hmung