Ukraine Vanlawng An Kah I Atla. Nizan ah Ukraine vanlawng Boeing 737-800 “Flight PS 752” cu Iran khuapi Tehran Khomeini International Airport in Ukraine khualapi Kiev lei zuang dingin aa thawh i minute tlawmpal avun zuan ah van ah apuak i aa citmi minung 176 an thi dih. Akong tampi purh dah mi lak ah atutiang ah afiang bikmi cu Iran nih; Vulei in Van ah kahnak i an hman mi Miakpi “Surface to Air Missile” timi in an kah ruang ah atla ti hi zumh bikmi asi. Vanlawng aa citmi ah atambik cu Iran miphun an si nain atam deuh hi Canada ah citizen in aum mi le sianginn kai lio mi pawl an si. Tutan thihlohnak ah asungcem mi cu Canada asi.

Cucaah Canada PM Justin Trudeau nih chunzan ngol loin akong kan hlat dih lai i asualmi nih sualman an in hrimhrim ahau ati. July 17, 2014 lio zong ah Malaysia vanlawng MH17 cu Netherlands ram Amsterdam in Kuala Lumpur lei avun i thawh i Ukraine ram cung azuan lio ah tutan Iran nih an hman mi miakpi bantuk bak hin an kah i aa citmi passengers 293 an rak thi dih khah. Kha lio an kahnak miakpi kha Russia ser missile asi i tutan Ukraine vanlawng kahnak zong hi mah hriamnam kha asi țhan tiah zumh bik asi. Asinain atutiang ahcun poipang i kah sualmi (Accidental Shot) asi tiah an chim mi atam. Phundang in chim ahcun ral lio asi caah Ukraine vanlawng nih kuanvai aa pah sual ti khin an maimilh piak hna.

Atlaak tlawmpal ah Iran nih vanlawng atlaak tik i aw khumhnak “Voice Recorder or Blackbox” cu US kan pe hna lai lo ati colh mi ruah ah Iran nih hin timh ciammam tein kah mi hna alo pah. Tutan athimi tambik hi Iran miphun an si nain Iran ram um mi siloin Canada ah apeem cang mi pawl an si i cathiam lawng te ngawt an si. University students, professors, engineers timi pawl an tam ngaingai hna. Canada ah hin Iran miphun citizenship ahmu cang mi hi 210,000 leng an um pin ah ahmu rih lomi, PR status pawl le student visa in ummi hi thong tamtuk an um rih. Iran Muslim pawl hi Canada an phanh hnu in Khrifa ah alutmi zong an tam ngai ngai.

Tutan atlami vanlawng cung ah Canada tambik an i telnak aruang cu Iran hi Western pawl nih sipuazi phihnak an tuah mi ram asi tikah Iran in western ram lei direct flight man hi afak ngai ngai. Cucaah Iran in Ukraine ram lei in vun ihel ah khin ticket man afawi caah tutan Canadian pawl zong hi Ukraine ram in Toronto lei zuang dingin an vun i thawh hnik cio lio caan asi. Kan hnu i Iran Quds General Qassem Suleimani cu US nih an thah hnu khan Iran nih US cu aphunphun in lehrulh atimh ve caah US ralkap hmun khuarnak pawl sel in an miakpi pawl an puah len mi zong hmuh asi. Cucaah US congress nih president Trump nih Iran raltuk kong ah Congress nawl loin ral akan thawh pi sual lai ti an phang ngai nain Trump nih Iran hi an sung cang timi alang ko ati. General Qassem Suleimani thah ding kong ah biapi cem in thazaang achuahtu le acawlcang mi cu Secretary of State Mr. Mike Pompeo asi ti asi.

Atu ca ka țial lio ah CNN news nih avun chim mi cu Senate Majority leader Mitch McConnell nih Rep Senator Mr. Josh Hawley nih Trump tazacuai kong ah dirpi ding in biatung adirh mi cu ahna tlaak pi i tutan Nancy Pelosi hruainak in Democrat nih Trump tazacuainak an chuah pi mi articles pawl paoh paoh hnon dih ding in hnatlak pinak min athut. Cun democrat tampi cu Nancy Pelosi nih hngep-hngap tiah an tazacuai nak ca pawl kha Senate ah kuat colh loin caan sautuk alaak mi kong ah an lungdong i ai zukphiat mi zong an um len cang ti asi. Trump caah thawngpang țha ngai si dawh asi. Kan peh țhan te lai. Upatnak he Victor Khen Sang