Kan theih dih bantukin kan Kawlram ca ahcun nihinni hi puichim ni le philh khawh ti lo ding, zungzal in a caam peng cang dingmi ni ah a chuah ni a si. Nihin ah kawl ralkap nih uknak an lak dih hnu ah a tanglei bantukin rammi mipi sinah thawngthanhnak le theihternak an tuah hi si.

“Thimnak tuahtthan hnu ah rampi nawlngeihnak kan aap tthan lai tiah Kawl ralkap nih thawng an thanh”. Kawl ralkap nih caan karlak (kumkhat) chung uknak a tlaih caan chung ah thimnak tuahtthan si lai i teitu Party kut cung ah rampi nawlngeihnak ap-pek tthan dingin MWD TV hmang in thawngthanh an hun tuah hi a si.

Relchih: Atu ahcun thilsining aa thleng tuk cang i ralkap nih Kawlram ah uknak an lak ngam hrimhrim ti lai lo” tiah kan ramkhel lei thiamsang pawl nih an chimmi kan rak zumh tuk nain an rak palh ve ko hih! Kawl ralkap nih uknak an lak sual zongah hlan bantuk cun an hlawh a tling kho hrimhrim ti lai lo” tiah kan ramkhel lei thiamsang hna nih an chimmi bel zeidah a lawh te lai, hngalh a si rih lo. Atu tiang a langhterning ahcun hlan tawn bantuk muisam a keng ko rih. Cozah lutlai an tlaih cang hna! Ram chung ah internet/phone tampi an phih cang.

Ramdang cozah tete nih a phung ning bantuk in sik cu an hun sik phot nain zei ngai phanhpi ding timhtuahnak an ngei lai zumh a um lo. Mipi leikap aw aan zeihmanh a um kho rih lo. “Ne Win chan ah” kan ti tawnmi cu kanmah chan ah kan hmaika ah a cang tthan ko cang hih! Joe Biden president tlin he aa tong celngel i Kawlram minung caah a tom tom in America ram phanhnak lam ongtu hna ah a va cang te hnga maw? Cu zong cu va chuak sehlaw, kan caah thil ttha a si kho hlei lo.

Hi buainak nganpi hi zumtu kan caah zeibantuk in dah Pathian nih tthatnak ah a mer te lai, timi ruahdamh chung khawh a si ti lo. Hna bei a dong, lungsi a vaang! Kan huatmi bikmi Ralkap uknak ah kan tla tthan ai! Thlacam dah ti lo zei ko dah zumtu nih kan tuah khawhmi a um? Kan Kawlram caah fakpi in thlacam cio hna u sih! Cattialtu: Hrambik Lian