UK PM Boris Johnson cu a zawtnak in ai ning deuh tiah an thanh. PM Johnson nih nizan cacawn nilini 9 April 2020 ah a rian ttuanhawi hna sin ah lockdown hi zarh zeimawzat chung cu sauh rih ding in timhtuahnak ngeih chung ding in a chimh hna. PM Johnson hi kan hnulei zarhhnih a luan ciami ah khan Covid-19 positive a si ti theih a si cang ko nain a rian cu pehtlai in a ttuan peng tthiam ko rih.

Johnson office lei nih an chimmi cu cacawn nilini zanlei ah khan felfai te in le a hlei in zoh a sinak hmun cun chuahpi a si cang tiah an chim. Johnson hi cacawn nikhatni ah a zawtnak a zualdeuh ti a si hnu in St. Thomas’ Hospital ICU ah a tu tiang hi chiah a si ko rih. An chim chih rihmi cu Johnson hi a ruannak le a thinlung hna cu a damlio bantuk bak a si ko rih ti a si. A mipum in meeting caan le thildang ah ai tel khawhlo caah Johnson aiawh in Foreign Secretary Dominic Raab hi a dirmi a si.

A cozah nih an thanhning in ramchung ah coronavirus in a thimi hi minung 8000 hrawng an phan cang. Cacawn nilini ah khan thawng an thanh tthanmi ah cun minung 881 an i chap ti a si. Cacawn nithumni ah khan minung 938 bak an rak phan. A zorlei cu an panh ti a lang. UK ramchung ah zawtnak a ngeimi dihlak theih khawhtawk hi 65,077 an si i a thi cangmi hi 7,978 an si. Cu lio ah a dam tthan cangmi hi minung 135 lawng an si rih. Italy ah a thimi an tambik lio caan ah hin 969 an phan i cucu March 27 ah khan a si. Spain hi a thimi an tambik lio caan ah 950 an si ve i cucu April 2 ah khan a si ve. Ref: ABC News