Pastor Ram Nawn Nih Mual A Liamtak: Kan riantuan hawi le kan far a simi Pastor Ram Nawn (Secretary, Education & Development Dept., CACC) cu a riantuan hawi le hna he Bawinu tiva i ngaram riahnak ah aa khawng i mual a liamtak ti thawng kan theih. Rammei a kangh ruangah a rilmi lung an um i cu lung hna a hrialnak ah aa teng i a lu le lung aa khawn ruangah a tu bantuk in a nunnak a liam a si tiah thawng kan theih.

Anu ta (a pu) umnak Phaipha khuahlun a phan deng tiah thawng kan theih. Cu hnu cun motor in Hakha ah tlunpi a si lai i thlacam pumhnak ngeih dih hnu ah thlan a tla lai tiah Rev. Kap Cin (Senoir Pastor, Senthang Baptist Church) sinin thawngpang kan theih. Vawlei khuaza ummi a miphun hawi hna nih kan tuar tuk hringhran. Kanmah nak in a tuar deuhmi chungkhar le khrihfabu caah thlacamnak in bawm hram hna usih. Credit: Danny Bawibikthawng

Tuzing cu, maw Pathian zei thawngpang hen ka theih; ka hawikom tha a ka dawtu Sayamah Pastor Ram Nawn (CACC) nih a kan liamtak ti ka theih cu lung kekkuai in ka um. Zeituah hmanh tha a tholo. Hibantuk hawikom le naihniam an liam lai ahhin ka pumsa nih a hngalh lengmang. Tukar ka nun a nuamlo, ka mang a chia ka ti theu!

Laitlang ka tlun fatin a ka dawtu le ka herhnak poh ah a ka hruaitu, ruahnak a ka cheuhtu le fim a ka chimtu asi. Theihhngalh ka duhmi tete, tliangte in a ka fianh zungzaltu asi. A lungnuamh caan ah le a lung fah caan ah, a lungumbia hna a ka ruah theu. Nizan tihni tiang kan ipehtlaihnak a cat lo. Thisa aa tlaimi kan silo nain; ta far chuakti khat bantukin aa dawmi kan si.

Midai, mitha, mi thinlung thiang, miphun a dawmi le a rian ah aa pumpemi upat tlak Pastor asi. A fimcawnnak le a riantuannak hrimhrim zong Chin nu hna nih izohchunh a tlakmi Pastor asi. Maw! vawlei nun hi a har hringhran ko dah. Hibantuk dawtmi hawikom he kan tian, kan ithen caan ko ahhin a fak khun! Bawipa tangnem ah idin ai kun mu. Rest In Peace Credit: Ram Tinthei