Nihin Hakha thawngpang a hnu bik theih khawh mi cheukhat update. Tuzing ka ah Cawbuk lei ah ralhrang le Chin ralkap kahdohnak a chuah caah ralhrang lei cu Mi 35, raltuknak helicopter in a rak bawmh hna tiah theih a si.

Thantlang lei thawngphang: Ralhrang Raltuknak Helicopter Nih Thantlang Lei Kap Ah Bomb A Thlak. Chin ramkulh khuapi Hakha ah SAC ralkap Helicopter pakhat a phanh hnu in raltuknak Helicopter nih Thantlang lei kap ah kahdohnak a tuah, tiah theih a si.

Nihin January 29 chun sml 12:52 ah Helicopter pakhat Hakha ah a phanh hnu in raltuknak Helicopter pakhat nih Thantlang lei kap ah kahdohnak a tuah. Hakha a phanmi Helicopter zong Thantlang lei kap ah a kal i, a rak kir ṭhan, tiah tualchung mi pakhat nih a chim.

Hakha Rungtlang ah a ṭummi Helicopter cu Thantlang lei kap a kal hnu in a rak kir ṭhan i a zuan pah ah a khu tam tuk a chuak. Chin hriamtlai nih an kah caah a khu a chuakmi a si kho. Hnawh nam tuk in a zuang i Rungtlang lei ah a kal ṭhan, tiah a chim chap. Cun, Mi 35, raltuknak helicopter hi Kalay lei hoih ah a kir cang tiah kan theih. Charhchan: The Chin Post

Thawngpang dang: Kawlram Mi Pa Pakhat Sin In Rupee Sing 139 Man Tluk A Simi Bingrang An Tlaih. India ram, Mizoram chung um Champhai khua palik gate ah Tangkhawng 27 ah Kawlram mi pa pakhat sin in Rupee sing 139 man a simi Bingrang tlaih a si tiah Mizoram palik nih thawngthanhnak an tuah.

Chim ramkulh Falam peng Sim Dihai khuami Lal Thawm Luai (kum 33) sin in Bingrang 279kg a ritmi cu Mizoram palik hna nih Champhai khua ah an tlaih i rithaisii le ramdangmi sinak pohmah 2 in taza an cuai tiah theih a si.