Tuzing Vaupi 4/20/2020 suimilam 11:00 tluk ah Tiphul lungah a phormi Skat motor a let i lungpurmi minung pahnih an nunnak a liam tiah theih a si. Motor hi Tiphul ah lung a phormi a si i Hakha an rak tlung lei ah atu bantuk in vanchiatnak an ton hi a si.

Lung a phormi hi Ram Ṭha Hmung kum le Rual Ting Cung hna an si. An pahnih in a hmun ah an nunnak liam tiah kan theih. Tantakmi chungkhar Bawipa nih an ngaihchaitnak chungin hnem hram ko hna seh!

The Chinland Post nih tling tein a ṭialmi rak rel chih: April 20 zing suimilam 11 tluk ah Hakha thar Nahau tlang lam kainak hmun ah lungphur mi motor (SKAT) aa let i a hmun ah minung pakhat a thi i siizung ah pakhat a thi than. Ai lehnak a ruang cu lung an phurh pah caah le motor thazaang nih a chei ti lo caah lam thlang pe 150 sannak hmun ah aa leh hi a si.

A hmun ah motor zultu a si mi Ram Tha Hmun cu a thi colh i motor mawngtu a si mi Rual Tling cu siizung ah a thi ve. Hi motor cungah motor mawng tu le motor zultu lawng aa cit mi an si. Mah motor aa let mi cu Pu Za Thang (khuathar um mi) motor a si tiah kan theih. Photo credit: Democratic Voice Of Chin-DVC

Ngaihchiatnak thawngpang dang: Tuzing cu lungthin  hung a nuam lo ngaingai. Facebook vun kau i a hung langmi R.I.P timi biafang lawngte theih ding a um. Tuzing Vaupi 4/20/2020 ah Hakha khua BEHS No. 1 ah caan saupi sianginn saya a rak ṭuanmi le a tu ah CCU Treasurer rian a tlaitu Hriphi khuami saya Thang Cem (kum 62) nih ruah lo piin mual a kan liam ti thawng kan theih.

Sayaci Thang Cem hi laitlang achuahkehnak cu Hriphi khua a si. Amah hi kum saupi cachimtu saya rian a ṭuanmi a si. A chimhmi sianghngakchia hna zong nih an ṭihzah upatnak ngaingaimi  a si. Caan saupi ca a chimh hna hnuah pension a la i Hakha ah khuasami a si. Amah hi dam lonak in caan zeimawzat a um hnuah tuzingah atubantukin mual a kan liam tak hi a si.