Tuzing Ah Israel Air Force Nih Syria Ramchung Um Iran Ralkap An Kah Tthan Hna

Tuzing deilei ah khan Israel Air Force hna nih Syria ramchung, Golan Heights pawng Tala al-Hara, Daraa province i Iran’s Revolutionary Guard Force le Hizbollah hna umnak an kah tthan”tiin Syria cozah thawngthanh SANA News nih a langhter. Cun, thi le hliamtuar an um le um lo theih si lo. Hi kongah Israel lei tu nih cun zeihmanh chimi an ngei rih lo.

Tal-al-Hara hmun hi Golan Heights hmun hi Six Day War, 1967 zongah khan ralkap umnak dingah hmun ttha le a him bik ti a si. Israel nih a ramri pawngah Iran ralkap hna nih hmun an khur ding hi a duh lo caah amah nih a ttha a ti caan paoh ah bomb- missile hmangin a kah tawn hi si.

Israel nih a duh caan paoh ah Syria ramchungah bomb le missile an hman peng mi cu UN Security Council ah an chim tawn. Nain Israel nih a ti ve mi cu kan hoi ttha deuh paoh hrawhpiak dih an kan timh pin ah vawlei Map tiangin holh a kan duh tu hna hi kan zoh sawh kho hna lo, cucaah a herh ning paoh in kan cawlcang peng ko lai tiin an chim ve tikah Syria dirhmun hi Russia zong nih chim khawhnak nawl a ngei lo. Syria ramchung ah ISIS a doh mi bantukin Iran ralkap le mifim thiam a sing leng an um i, hi hna pawl nih an i timhbik mi cu ISIS doh si loin Israel hloh khawhnak dinglam an kawl bik hi si.

Cun, Syria pal in Lebanon ram i Hizbollah-Shia muslim ralhrang pawl hriamnam le phaisa in an bawmh hna pinah training zong ttha taktak in an pek chih hna. hriamnam a phurtu a si tiah theihmi truck convoy zong cung leiin Israel nih F-16’s fighter hmangin a kah ttheu tawn.

July 19 zongah khan Iraq ramchung Baghdad khuapi in 180km a hla Tuz Khurmatar khua i Iran bawmtu an tiah ruahmi ralhrang umnak zong Drone hmang in kah a si i, mah hi Israel Drone maw? US dah si timi theih a si thai lo. Mah hmunah Iran ralkap Revolutionary Guard Force hna le Popular Mobilization Force Unit an timi, Dalah -a-Din Coalition Force Unit hna an um ti a si.

Hi kongah mi tthenkhat nih cun Turkmen Brigade timi, Iraq’s Hasheel-al-Shaabi militia pawl an si tiah an chim ve. Mah drone nih hin Hizbollah ralhrang le Iran ralkap a thah hna tiin, Ashara-al-Awsat thawngzamh ca, London base nih cun a langhter.