Tuzan Thantlang mipi an thil tuah cu lung a tlingtuk hringhran. Kan theih bantukin kanram cu Kawl ralkap nih uknak an lak tthan tikah mipi vialte ngaihchia le lungkuai in um dih cio a si. Cu tikah Ralkap nih uknak an lakmi le an kut tangah um tthan ding cu kan duh hrim lo, timi langhternak caah mah le umnak hmun cio in umkheng tum cio a si.

Ralkap uknak kan duh hrimhrim lo timi langhternak caah tiin umkheng tum cio a si tikah nizan lawngah minung 47 an tlaih hna. Mah chungah Hakha ah pakhat an taih i, Thantlang ah pakhat tlaih si ve. Tuzan zongah ralkap uknak doh in umkheng tumnak cu mah le umnak inn cio in peh zulh tthan a si.

A cunglei kong he pehtlaiin Thantlang mizapi nih Ralkap uknak kan duh lo ti langhternak caah tuzan suimilaam 8:00pm ah khan umkheng lawng hmanh si ti loin “darkheng” bak an tum cang. Nizan an tum cu palik nih an tthawl hna i, tum hlah u’ tiah an ti hna. Asinain tuzan an tum ahcun palik lei zong nih zeitin hmanh an ti lem ti hna lo tiah theih a si. An lumgfim ve cang rua.

Salai Lungthli Tu: Sehtan phu thawlnak ah cun hriamnam tha ngai a si, meithal nakin hmual ngei deuh. Yangon cu umkheng tum thawng nih khuapi a hninh ko. Min Aung Hlaing a thinphang pah cang ko lai dah.

CNLD phu nih cathanh an chuah i ralkap tuah sernak cu ‘အာဏာ ထိန်းသိမ်း’ timi biafang an hman, nawlngeihnak ven piak chung ti duhnak khi a si. Ziah miphun party ai timi nih biafang dik zong an hman ngam hnga lo? Ralkap an thinhung sual lai ti an phang rua. Luakchuak khi an si ko.

Mah bantuk ralchiat cathanh nan chuah nakin nan chuah lo a tha deuh. Ni 4 chung dai tein nan um kha hna thiang deuh. Suu Kyi doh le thangchiat caan lawng ah nan thawng i nan raltha. Atu caan ah hin miphun le ram caah ramrian a tuan taktak mi le party le pumpak hlawknak ca menmen ah politics a tuahmi nan sining dik a lang tawn.