Tuzaan ah Hakha ah Pu Ṭuan Ceu fale ralhrang nih an tlaih hna

Chin News

Hakha Khuathar ah Pu Tuan Ceu Fale Pahnih Ralkap nih an Tlaih Hna. Tu zaan sml. 9:00 hrawng ah Hakha Khuathar, Thantlang lei kalnak lam ah a ummi Pu Tuan Ceu i a fale pahnih ralkap nih an tlaih hna, tiah thawng kan theih. Tlaih a tongmi Pu Tuan Ceu fale pahnih hi Zo Thang le Tluang Thang an si.

Kawlmi hna an umnak Shwe Man Thu dawrkhaan ralkap nih an bauh hnu ah inncung ah a ummi Pu Tuan Ceu fale pahnih an tlaih hna hi a si. Zei ruang ah dah an tlaih hna timi fiang in theih a si lo. Source: The Chin Journal, April 13, Hakha

Hakha ah Ralkap le Palek nih tlaih i hrem mi pakhat cu an thlah hnu ah a nunnak a liam. Hakha ah Ralkap le Palek nih March thla dih lei i minung 5 an rak tlaih mi chung ah aa tel mi Yangon khuami pakhat cu, an tlaih hna lio ah an hrem hna, thlah an si hnu ah sii-inn a phan i voi hnih tiang aa thlop hnu April 13 zaan ah a nunnak a Liam.

A thi mi pa hi Shalom Guesthouse ah rian a rak tuan mi a si i amah hi pawfah zawtnak a ngei mi a si. Tutan a thi mi hi Kawl panga le Tedim pakhat an rak tlaih hna lio ah aa tel ve mi a si.

Tlaih an ton i thlah than an si hnu in minung pathum zong an hrem hna ning a fah ca ah rian an tuan kho ti lo. A nunnak a liam mi pa hi, sii-inn ah voi hnih tiang aa thlop i a dam khawh ti lo ca ah a nunnak a Liam hi a si tiah thawng kan theih. A ruak cu April 14, Hakha ah vui a si lai tiah kan theih. Source: Democratic Voice of Chin-DVC

Biakilh: Thawngpang fiang deuh in kan rak thanh than lai.

Ralhrang pawl cu An Battalion Commander telh in a thimi tam taktak. Kachin Ram Alaw Bum Sakhaan Kahdohnak ah Myanmar Ralkap a Thimi an Tam. Kachin ramchung, Tuluk ramri pawng ah a ummi Alaw Bum sakhaan lak ṭhan ding Myanmar ralkap nih vanlawng in ni 4 chung pehzul in an doh nain Myanmar ralkap lei in a thimi nitin in an karh, tiah theih a si. Alaw Bum tlangcung i sakhaan hi Myanmar ralkap nih kum saupi an rak tlaih nain kan hnu March 25 ah KIA nih an rak lak khawh.

Cu tlang cu lak tthan ding in ni 4 chung pehzul in Myanmar ralkap nih vanlawng in an kah i, Tuluk ramchung zong vanlawng bomb 6 an vung tla. Cu lawng si loin Myanmar ralkap nih Tuluk ramchung tiang ah an vanlawng an zuanter i Tuluk ram lei in Alaw Bum tlang cu fak taktak in a den nain atu tiang an la kho lo.

KIA chimnak nawlngei Col. Naw Bu nih, “Ni 4 chung pehzul in vanlawng in Alaw Bum tlang an rak kah. Ralkap thazaang an chap chin thluahmah i, kahdohnak a fak chinchin ko lai,” tiah Irrawaddy ah a chim.

Vanlawng hmang in Myanmar ralkap nih an kah pin ah kee ralkap bu hnih nih KIA cu an kai hnawh hna. Asinain, Myanmar ralkap in Battalion Commander pakhat telh in ralkap tampi an nunnak a liam. Cun, a tlawm bik Myanmar ralkap minung 8 a nung in an tlaih hna.

Nihin zinglei zong ah Phakanh khua lamzawhtu pawl tthenhmal ding in a rami ralkap motor cu Phakanh khualuh lai ah Landmine in an puah hnawh i, ralkap le palik minung 5 an thi. Butao lei zong ah nihin ah ralkap motor tlarpi cu KIA nih lampi ah an kah i, kahdohnak fak ngaiin a chuak. A thimi an um le um lo theih a si rih lo. Cun, nizan April 12 ah Moekok ah KIA le Myanmar ralkap an i kap i, Myanmar ralkap lei in minung 10 an thi, tiah DVB nih a langhter.

Momauk peng chung i palik checkpoint pahnih le Tarpein hlei pawng i ralkap sakhaan pakhat zong KIA nih nizan ah an lak cang. March 25 ah KIA nih Alaw Bum tlang an lak hnu in Kachin ramchung hmun kip ah le Shan ramkulh chung ah KIA le Myanmar ralkap karlak kahdohnak a fak chin thluahmah. Source: The Chin Journal. April 13, Yangon (DVB, Irrawaddy)

Leave a Reply