Salai Dal Mun Mang motorcycle accident in a nunnak a liam. Salai Dal Mun Mang motorcycle accident in a nunnak a liam 2020 January 26 ah cycle accident a tongmi Salai Dal Mun Mang cu 2020 January 27 suimilam 10:00 pm ah Kalay sii-inn riantuan siibawi zohfel duhlo ruang ah a nunnak a liam, tiah kan theih. Hi kong he pehtlai in Saya Kim Tuang nih, “Technical University (Kalay) ah kum nganak Mechanical Power siang ngakchia tlangval Dal Mun Mang motorcycle accident kong he pehtlai in Palek cathanh a zohtu dihlak a ngaihchia lo mi ahohmanh kan um lai lo dah tiah ka ruah.

Tlangval Dal Mun Mang thihnak ah Kalay sii-inn rian ngeitu hna sin ah biahalnak tampi a chuak kho mi a si. Dal Mun Mang hi cycle accident a ton lecangka suimilaam 10:30 PM ah Palek nih sii-inn lei ah an tlikpicolh ko nain chungkhat zohtu a ngei lo, tiah siibawi nih zohkhenh duh loin a thaizing January 27 tiang a um i, a kih lawng si loin a thi a chuah tuk ca ah a tuar kho ti lo i a nunnak a liam,” tiah The Hakha Post ah January 28 ah a chim. A thihnak kong he pehtlai in a tanglei bantuk in Zomi hna nih cathanh le biahalnak an tuah.

Pakhatnak ah Palek nih cathanh an tuah ning in Emergency mizaw in suimilaam 11:30 PM ah Palek nih siiinn ah an kalpi ko nain zeiruang ah dah sii an pek duhlo (sii an pek duhlonak kong he pehtlai in palek hi kan tehte an si). Palek nih sii-inn an kalpi tiang ah hin tha tein bia zong a chim kho rih ko. Pahnihnak ah zeiruang ah dah January 26 zaan ah thi he hnai he sii-inn a phan mi mizaw zohkhenh duh loin chungkhar ngei lo mizaw ah an chiah. Emergency thihlut a herh zong ah Kalay khuapi chung ah bawmchantu phu tampi an um ko.

Bawmhchanhnak zong an pek zungzal ko. Kanmah nakin sii lei ah a thiamsang mi siibawi hna nih a herh mi cu nan hngalh deuh ko. Zohkhenhtu chungkhar a ngeilo nan ti zong ah nanmah nih Facebook in thawnghal khawh le hlat khawh a si ko lo maw? Pathumnak ah siibawi nan rak si lai ah bia nan rak i kam mi kha nan philh cang maw? Palinak ah atu bantuk in nan zohkhenh duhlo mi hi khawndennak a tong mi mizaw bawmhchanh ding le thlopbul ding Upadi Chapter 6, Pyidaungsu Hluttaw Upadi No.53 hi mithmuh kuttawngh in nan buar a si.

Panganak ah atubantuk in kan i bochan mi a nunnak nan liamter hi zeitluk in dah nan tuahto ti mi hi rak i thei zungzal u, tiah mizapi nih cathanh an tuah. Tlangval Dal Mun Mang (kum 24) hi 2018-2019 ZSK-Universities Myanmar ah Chairman a tuan i, U Thang Khua Hau le Pi Huai Khup Vum hna i an fapa a si i, Tedim khuapi ah khua an sa. Cun, Yangon School of Political Science le Kalay Technological University ah fimnak a cawng. 2020 January 26 zaan Kalay Myoma bazaar pawng ah a cang sual mi a si. (By: Salai Tluangte

Breaking News: Pi Bawi Nei motorcycle pahnak in a nunnak a liam. Kalay peng Aungywa khuami Pi Bawi Nei (kum 78) cu tuzing January 27, 9:00 am ah motorcycle pahnak in a nunnak a liam, tiah kan theih.

 

“Aungywa khua chuahlei Phulmawi kalnak lo lam ah an hring phurtu Kawlpa, nih a pah mi a si. Hi Kawl a nih hin a pah lecangka in keimah sin ah bawmhnak a rak ka hal i Pi Bawi Nei cu Tahan lei ah kalpi ding in kai tim. Kai timhlamh lio ah a thazaang nih a tuar kho ti lo i a nunnak a liam,” tiah Kam Te (Tahan) nih The Hakha Post ah a chim.

Aungywa khuabawi U Tin Lin Mawng nih, “Motorcycle in a pahtu Kawlpa i a chungkhar hna nih Pi Bawi Nei te chungkhar cu ngaihthiam an va halcolh hna. Pi Bawi Nei techung nih tangka sing 5 an hal ve hna i an i ngaihthiam veve. Mi pahtu Kawlpa zong aa lawm tuk ve i vok thahpiak a timh hna nain kan khua phung le lam nih a pek lo caah a ruak vui thaizing tu ah a thahpiak hna lai,” tiah The Hakha Post ah a chim. Pi Bawi Nei hi fale he khua a sa mi a si i, a pasal nih a thihtak cang mi a si. A ruak hi thaizing January 28 ah an vui lai, tiah kan theih. Photo:Cin Pak

Breaking News: Pakokku ah University a kai liomi Chin nute Ayeyadawy tiva pi ah a pam. Mindat peng Kunna khua i Pastor Lawng Huan fanu Mai Esther cu a hawi le he Ayeyawady tiva ah tii an i kholh i tii ah a pam tiah kan theih.

Esther hi Pakokku University ah Botony Major in kum thumnak a cawng liomi asi. January 26 suimilam 4:00 pm, a hawi le nu pawl he Ayeyawady tiva pi ah ti kholh ah an kal i, ruah lo piin tii ah a pam. Atu tiang a ruak hmuh a si rih lo. Hi kong he pehtlai in a chung le sin ah pehtlaihnak The Hakha Post nih kan tuah nain phone an tlai lo. Photos/Esther Fb. Credit: The Hakha Post