Thinphan Awk Ah An Ruah: Tutan Jan 6 ni US khualipi a cangmi cu tuanbia chia ngaingai asi tiah chim lengmang asi. Duh lonak langhter khawhnak ram asi nain duh lonak ruang ah kar hlei tuk lamh i hrawhnak le thihnak tiang a chuah tertu lungput nih US ram a mui a van chiat ter.

Vawlei ram vialte caankhat cu a mui a chiat caan a um viar theu, a ruang tu ai dang cio tawn. Hi thil a cangmi lak ah Khrihfa biaknak hruaitu cheukhat hna nih kan biaknak caah tihnung mi a um tiah an ti. Cucu a bik in “Jesus Save” timi aalan le Khrihfa aalan put in cozah inn boh le luh hnawh mi kha asi. Khrihfa tuan bia zoh tik ah Pathian min hman in mah duhnak tlinnak caah ruru hranghrang in an cawlcangh tik ah thisen a luang tawn nain Pathian pennak a kau chinchin lem loh.

Peter nih Jesuh tleih ah a rami ralkap kha nam tein a doh hna nain Jesuh nih a fimter than, cunih a chimduhmi cu Khrihfa mi hna nih Pathian bia le min hi buainak le namnet nak ah siseh midang titsa fah le thisen luannak caah hman a duh lo zia kha a langhter. Cucaah a hlan chan i a rakcangmi Pathian min put in khrihfa ralkap tiah zumlo tu an rak thah hna le an mah duh paoh in an rak tuah lio chan bang kan biaknak hi kalpi le nunpi than dawh kan si tiah an ti.

Dawtnak le vel in a luangmi thawngtha kha vainam le hriamnam ah kan ser sual ah cun Pathian pennak a bi chin lai i Khrihfa muisam cu muidup ah phak a fawi te. Bible cawnpiak ning he ai kalh ngai ngai. Cucaah Paul nih thawnnak a ka petu khrih thawng in zei thil paoh ka tuah khawh ko hna a timi hi amah minung duhnak tlin kha si loin Pathian sunparnak le dawtnak a vel a karnak caah i tuah khawh kha a chim duhnak asi.

Tikah kan nih laimi zumtu zong US rampi ah kum 20 leng khua kan va sa ve cang bang in kan mah le tawk cio in tanhmi le dir pimi kan ngei ve. Cucu a dik mi le ma duh thimnak cio asi ko. Sinain kan nih tu nih cun hi ram caah thlacam le thil tha tuah kha i zuam chin leng ko usih. Trump a tuan lio ah thla kan cam peng bang in Biden a tuan zong ah kan cam a herh thiam. Kan cam tik ah Biden ca le democrat hlawknak asi lo i ram pumpi minung dihlak ca asi kha fian ah cun cam khawh lo awk a um lo.

“Biden te lei an bawi ruang ah Pathian a fa deuh hlei lai lo i, Trump te lei an bawi ruang ah Pathian a thawng deuh hlei lo” Pathian cu pathian asi ko. Kan duhnak cu zei lei paoh si ko seh si nain Pathian min hmang in hrawh le buai nak chuah ter le hliamnak ral thawhter te hna tu kan hman lonak hnga a bia pi tuk. Pathian muisam ceu ter tu si hi Kan Miphun thluachuah sangbik asi ko lai.

“Dawtnak le Avel in a luangmi thawngtha cu hriamnam le nam netnak ah hman sual ah cun Pathian pennak a mui chiat ter pin ah Sehtan thlaici tu kha eden thar ah keuh ter bantuk asi” Note: Keimah ruahnak asi. Tulio cangmi kong ah biaknak le mit in ka van cuanh ve mi te asi. Credit: By. Ronald Charles Nunuk