Atu lio US thimnak kong nih kan thinlung a kan buaiter cio lai dah timi zumhnak ka ngei. A ruang cu November (3) in thimnak hi tuah a si cang nain nihinni tiangah a hodah teitu si timi biachahnak tuah khawh si rih lo. Atu dirhmun cun Biden nih a tei dirhmun ah a cang nain vote thlak ning a dik lo, lih le hrawkhrawl in tuahmi a si,tiah Trump te phu nih hi thimnak hi kan zohpiak tthan u tiin nawlnak an tuah ve.

Hi kongah cheukhat nih cun zeitlukin tazacuainak le duhlonak a langhter len zongah Trump hi a sung ko lai, Biden a teinak ding lam um ti lo, tiah mah le ruahnak chim le ceih cio a si. Cun nihinni tiangah US a cozah pi zong nih hi kongah biachahnak reprai a tuah kho ve fih lo. Hi thimnak hi zeitiang dah aa awh lai timi theih a har ngai. Hi kong he pehtlaiin Trump nih vawleipi nih an kan cuanh cang hih”tiah Biden cu a vun phomh ve.

President Trump nih Joe Biden cu social Media hmang in he tiah a vun phomh tthan cang. “Ka rian ttuanti pawl nih dik loin vote thlak mi tampi a um mi an hmuh lio ah zeiruangah dah Joe Biden nih President si khawhnak ding caah rian ttuantu a thim hna? State pali ah zeithil poah a thleng kho mi a si, teitu dirhmun ah kan dir kho. Court le legislature nih US ram i thimnak ah zumh awktlak te in thil an rak tuah tawn bantuk in tu tan thil a cang mi zongah a dik ning in rian an ttuan lai ti” ka zumh.

“Election hi mipi nih an cohlan khawhnak ding caah America caah zumhtlak in rian an ttuan lai ti ka zumh. Vawlei cung ramkip nih an kan zoh cang hih” tiin President Trump nih social Media ah a ttial fawn. Atu tiang State paruk ah election kong zeihmanh thil sining state cozah nih a langhter khawh lo caah Emergency appeal an tuah mi cu Supreme Court nih a cohlan cang. Atu hi Supreme Court Judge panga nih state paruk ah buainak a um mi cu ttha tein dothlatnak an tuah lai i, mah hnu ah biachahnak an tuah te lai.

Relchih: President Vladimir Putin Nih Joe Biden Cu US President In A Cohlan Lonak Kong A Chim Cang. Russian President Vladimir Putin nih “Joe Biden cu US President a si cang tiah lomhpi awk a ttha rih lo. Teinak ka hmu a ti nain US Cozah pi nih phungning tein an fehter rih lo bantuk in Donald Trump pumpak hrimhrim zong nih Demorats teinak an comi cu a cohlang kho rih lo” tiah a chim ve. US rampi President thimnak cu a luancia zarhhnih ah rak tuah cang mi a si.

Kan theih bantukin hi kong ah Media tampi nih cun Joe Biden nih teinak a hmuh tiah thawngthanhnak an tuah cio dih. Vawlei mipi hmai ah Joe Bidin nih teinak a hmuh tiah an au len nain Donald Trump pumpak le a team pawl nih an cohlang lo, a ruang cu thimnak, vote relnak ah lih le hrokhrawl a tamtuk, a dik lo ning in media nih thil an langhter chung ruangah a si fawn ti asi.

Hi kong he pehtlaiin nizaan cacawn zarhpi (Sunday) ah khan Russian President Vladimir Pu Tin zong nih “Joe Biden hi America President a si tiah va lawmhpi awk a ttha rih lo, Upadi ning in President tling ah cohlan a si rih lo. Cun, Biden nih teinak a co hrimhrim timi cu Donald Trump le a team, opposition Party lei zong nih nihinni tiangah an cohlang kho rih lo.

Kan mah Russian nih cun America mipi dihlak nih zumh le lungtling tein an thim mi, phungning tein fehternak an tuah mi President he paoh rian kan ttuan tti ko lai, a sinain Joe Bidin cu President a tling cang tiah chim awk le fehter awk, lawmhnak va langhter dingah ah a ttha rih lo” tiah Russian President Vladimir Pu Tin nih a chim hi asi.

Hi Bia hi Putin nih an mah Russian Television in bia a chim lio ah a telh chih mi asi. America President taktak cu mipi lei nih zumhnak taktak he fehternak a um hnu le Upadi ning, official in fehternak an tuah hnu ah a fiang ding a si ko. Cucaah Joe Biden va lawmhpi awk ah a tuan tuk rih, President a si cang timi fehternak pei a um rih lo cu,”tiah Russian President Vladimir Pu Tin nih cun a chim.