Thantlang mipi cu inn a kangh tiah hlen an tong i theih a si. Thawngpang fiang ngaingai cu a si loh. Mipi athong leng tluk chikhatte an chuak dih. Asinain a kanghnak hmun le hma, a kangmi inn zong hmuh le theih a si lo tiah theih a si. Atu tiang cu zei bantuk thawngpang hmanh a um rih lo.

Hi kong he pehtlai in The Voice Of Democracy timi thawngzamhnak nih a hitihin a taarlangh “June 16 zaan sml 10 tluk ah thantlang palek sakhan pawng ah inn akaang tiin thantlang meithat zung thawng an thanh hna. Thantlang meithat zung zong meithahnak motor 3 bak he leklak an chuak colh.

“Mipi athong leng tluk cikhat te ah an chuak dih. Asinain khoi ka ahdah, aho te inn akangh zong theih le hmuh asi lo. Mi tam u nihcun hlennak asi lai, asi loah meithat zung an dehnak asi lai tiah ati mi zong an um. Thantlang meithat zung an cawl cangh ning cu an khul arang i upat an tlak ko,” tiah an taarlangh. Credit:The Voice Of Democracy

Atu lio a hunglinsa ngaimi rampi thimnak kong Salai Lungthli Tum nih a ṭialmi rak rel chih:

Caṭialtu: Salai Lungthli Tum

State MP caah Pu Lal Maung Cung thim awk a sinak aruang – 2
1. Pu LMC cu a dang hmunhma thim awk a ngei lo. Rampi MP cu a ngamh deuh lai lo, peng dang in luh ahcun a tlin lo ding a fiang cia. TT peng State MP hmunhma a tin lo ahcun thimnak luh lo a hau ding a si. Khitluk party caah a caan le chawva a pek i tukum thimnak luh lo ding cu a caah a fak tuk ding khi a si.

Nain, Salai CBT cu thim ding hmunhma tampi a ngei. Thantlang peng in Rampi Hluttaw hmunhma le Hakha peng in State MP or Rampi MP hmunhma ai thim khawh. Hakha peng in ai cuh zong ah tanpitu tampi a ngeimi a si i teinak a hmu kho ko. 1990 election lio hmanh ah Pu Lian Uk cu Hakha peng in a rak i cuh i a tling ko. Atu zong peng dang in mi tampi an rak i cuh ko.

2. State MP cu vuanci tuan khawh lo ahcun zei pipa rian an tuan khawhmi a um lo. A chel ah meeting an thu i budget thenphawt kong luala an ceih i caan a dih tawnnak hmun a si. Zei pipa an tuan khawh lo ning cu atu lio Dr. Hmuh Thang le Pu Van Thawng khi hmuh khawh an si. 2010 ah a tlingmi Chin party MP zong kha zei pipa an rak tuah khawhmi a um ve hlei lo.

State Hluttaw ah zeibantuk federal kong ceih zong a um lo, tuhnu zong ah a um lai lo, a um phung zong a si lo. An rian a si lo. Nain, Rampi Hluttaw ah cun kan ram caah a biapi bikmi upadi tampi an ser, an remh i hlonh awk an hlonh. Ram sersiam ning an ceih. Rampi hruaitu president tiang an thim. Rampi tungmer nak hmunhma a si.

Federal halnak ding le ceihnak ding hmunhma zong Rampi Hluttaw khi a si. Salai CBT hi federal kong a aupi ngaimi a si. Kanmah lawng federal a duhmi kan si, federal duh ahcun kanmah vote kan pe u timi a aupitu zungzalmi a si.

Nain, atu cu federal kong ceihnak hmun ah i cuh i tim loin State luala ah i cuh ai tim khi sullam a um lo. ‘Tisartlam tlaih kai timh, ka zum ko u’ tiah mipi hmai aukhuan len i Timit va ah Lai meithal puahceh he tisartlam va bawh he ai lo.

Cucaah, State MP caah cun Salai CBT a pam tuk, CNLD EC nih Rampi MP hmunhma an ser piak awk a si. NLD candidate Pu Chan Ham cu tih tuk awk a si lo. Pu LMC nih a ngamh tuk ko lai, a tei ko lai zong ka zumh. Tampi nih nan chim bang, Pu LMC nak cun Salai CBT cu zumh a um deuh hen ta.