FA PAWIMI CAAH VISA HAR LAI. President Trump ṭheu cu a si hoi ko. Nau pawi bu in US tlawn ai timmi caah rikhiahpiakmi phung thar “new rule” an ser i thaizing-Friday in hman colh a si lai tiah thawngthar a chuak hoi. Kan nih Chinmi caah cun a poi lem mi cu a si lo nain Tuluk-China le ram dang pawl caah cun a poi ngai ko lai.

Nau pawi bu in US tlawn fa ngeih tiang cam beh i US ram i hrinmi fa ngeih i US ah um thai hi Chinese pawl nih kum 15 chung bak an rak tuah cang. Chinese nau pawi pawl nih hin nau ngeihter duh ah California state i Clinic pakhat hi $50,000 tehna zik an nawh tawn hna an ti. Kum hmasa ah khan FBI nih an theih hna i a ngeitu hi an tlaih pin ah clinic zong an kharpiak hna.

US ram luh-pem nak lam-kua i a hmangmi caah cun thawngchia cu a si kan ti lai nain ram ngeitu caah cun ram runvennak hauhruang pakhat sakpiak phun cu a si ve. Ram ngeitu cu pei an si fam cu. An zulh teh a hauh ko lai. Ref: The Chin Voice

Ṭih A Nung Chin Lengmang Singapore Tiang A Phan Cang. Atulio vawleipi nih a ttih taktakmi zawtnak ttihnung Wuhan Virus zawtnak cu Singapore ram zong a phan ve cang tiah CNA nih a chim. A zohkhenhnak ding sii-ai an thei kho rih lo i World Health Organization (WHO) pawl zong an lungrethei i an lungvai vuan ngaingai ti a si. Singapore i Wuhan Virus zawtnak a ngeimi an hmuhmi cu China putar kum 66 mi sinin an hmuh tiah theih a si.

China, Wuhan khuapi ah a ummi an sinain Wuhan Virus zawtnak an ttih ruangah 20th January 2020 ah China ram chuahsan in Singapore ah an tlawng. Vanlawng chung an tthut ah adang a faah pah ti a theih i asinain zawtnak dang a ngeih lo ruangah tthatthi in zohfel a si lo. Singapore an phak hnuah a hung zaw ngaingai i ni 23th January ah Singapore General Hospital ah a va piah.

A thisen an check piak i zaan suimilam 10:00Pm ah Wuhan Virus a ngei ti an chimh. Zohkhenhtu Siibawi hna nih ralrinnak an pek i a chungkhar member 8 zong an check hna hi a fapa kum 37 zong Wuhan Virus zawtnak cu a ngei ve tiah an chim chap. An i citmi vanlawng zong hi China Southern Flight CZ351 a citmi an si i a citmi minung 30 zong zohfelnak ngeih dingin MOH nih an auh tiah theih a si fawn.

China ram in Singapore ramchung a lutmi an tamtuk ruangah nawlngeitu hna an thinphang ngaingai. Hongkong, Japhan, Macau, South Korea, Taiwan, Thailand le United States zongah Wuhan Virus ngeimi an um len cang. January 24 ah minung 25 an thi cang i i minung 830 nih Wuhan Virus zawtnak an ngei tiah theih a si.