US President thimnak cu ho nih a tei tiah official ngaingai in an thanh kho rih lo. CNN nih Biden electoral vote 253 a hmuh i, Trump nih 213 a hmuh tiah a tial. Fox news nih cun Biden nih 264 a hmuh i, Trump nih 213 a hmuh tiah a tial ve.

Trump nih Pennsylvenia- North Carolina- Georgia- Alaska a laak ahcun 268 a si lai. Nevada hi atu lio ahcun a biapi ngaingai mi a si. Nevada ah Biden tlawmte in a thawng deuh. Biden nih Nevada a laak ahcun 270 bak te a ngah lai i, teinak a co lai. A ngah lo ahcun Trump nih tei khawh thiamthiam a si.

President Trump nih cun hmun tampi ah Democrats pawl nih vote firnak le lih le hrokhrawlnak tampi an tuahmi hmuh khawh a si tiah a chim. Phungning tein thlakmi thimfung in cun teinak kan hmuh khawh ko” a ti. “Thimfung relnak hmun ah thil dik lo tampi a um caah Supreme court biachahnak a hau te lai” tiah tu zanlei White House Press conference ah a chim.

Senate thimnak ahcun atu ning in cun Republican nih 52 hmuh dawh an si i, Democrats nih 48 hmuh dawh an si caah Senate cu Republican party nih control dawh a si. Senate ah hin thutdan 100 a um i, thutdan 51 a hmumi nih teinak an co lai.

House thimnak ah Democrats pawl nih tei dawh a si nain an thutdan 8 cu Republican nih an laak piak cang hna. Atu tiang result a chuak cangmi ah Democrats nih thutdan 208 an ngah i, Republican nih thutdan 192 a ngah lio a si. Thutdan 218 a hmu khomi party nih house ah majority an si te lai. Cattialtu: Salai Lairamthang