Tutan Dr. Aung Myint Thang Caṭial Cu A Hman Ngamsam Zeitindah Nan Ruah Ve Cio Rak Zoh Ve Tuah

Thi Hlu A Duh Lomi Laimi Khrihfa: Laimi nihhin mizaw zual hi kan ngeih peng hna. Thi hlu haumi mizaw zual hi an um lengmang. Hakha ah Saya Cung Hu nih thi hlu nak foundation a kan tuah piakmi cungah kan i lawm. Asinain Laimi mi tampi nihcun mi nunnak khamhnak caah thi hlu hi kan duh hna lo. Kawl tu nih fawi tein an kan hlu tawn. Kawl cu voi 40 leng thi a hlu cangmi minung an tampi. Laimi ah kan um rih loh. Yangon i a ummi Laimi mizaw zual, thi hlu a hau mi, mi tam deuh cu Kawl nih cun an thi an hlu ngawtmi kan si. Yangon i a um mi Laimi nih an thi an hlu mi hna hi cu pahnih/khat taktak khi a si.

Yangon hi Laimi tam nak khua bak a si ve. Bible siangin le university a kai liomi nungak tthawng le tlangval tthawng an tamnak bak a si fawn. Asinain thi hlu a herhmi kan Laimi, mizaw zual an um ti chimh sual ahcun ai theih ter lomi an tam, ai thupmi an tam, cun tin ka si/kha tin ka si e, a timi ngawt an si. Anmah i thi hlu lo nak ding lam lawngte an kawl hna. Acheu nihcun anmah inchungkhar member mizaw zual hmanh kha thi hlu an ngamh hna lo. Cucaah Laimi mizaw zual hna cu Laimi acheu nih nan huat ngaingaimi, Khrihfa zong a si lomi, Kawl pawl sinah bomhnak hal lengmang kan hau. Kawl nih an thisen an kan hlu caah Laimi mitampi cu thihnak in kan luat.
Zeiruang ah dah Laimi nih thi hlu hi an duh hnga lo?

1. An thisen kha man faak tukmi ah an rel. Laimi nih kan ruahnak ahcun thisen thawl khat hi a man a tam taktakmi, a tingting, man ah ruah a si. Kawl mi pakhat nih a thi thawl khat an kan hlu ahcun Ks. 15,000 hrawng hi taxi man peek ah an i zaa diam. Laimi nihcun an thi thawl khat hi a ting man ah an rel. Cucaah an thisen kha an siang hrimhrim lo. A hlu van chim lo, a cawk zong an siang hna lo.

2. Thi thawl khat hi rawl sau tuk ka eimi a si tiah an ruah. Laimi mi tampi nihcun kan thil thawl khat hi a kum in buh le sa ka eimi a si tiah an ruah. Cucaah thi thawl khat hna van hlu cu voksa, arsa, caan saupi an eimi asi tiah an ruah caah cuhlan i harlengmangin kan eimi arsa, voksa i a rianttuannak vialte midang sin i van kal ko ding cu apoituk tiah an ruah caah an sian lomi an si ngawt. Cucaah Laimi cu thi hlu a khomi an har ngaingai.

3. Thisen umtuning kan lung a piang lo. Thisen cu kan hlu hnu in thla hnih hnu ahcun kan hlumi thisen zat kha kan ngei tthan. Zarh 12 hnu ahcun midang zong kha hlu tthan khawh a si. Kei zong ka hlu bal i phan ding a um lo. Ka lung zong a mit lo, ka zaw fawn lo. Ka zeihmanh a ti lo. Khakha Laimi nih a ruah awk kan ngalh lo caah kan ttihmi a si.

4. Laimi Khrihfa kan sining a dik lo caah. Lai Thlang i a hlimlaam i Bawipa ah kai lawm tuk ka um kho lo a timi pawl khi, mizaw zual an um na thi na hlu kho hna hnga maw va ti hmanh uh, an zaam dih lai. Kan Khrihfa sinak le Bawipa ah kan i lawmhnak hi mi caah tthathnemnak a chuahpitu thil tuahnak caah hman a timmi kan si hna lo. Mah pumpaak diriamhnak men caah a hmangmi zumtu kan si caah thi hlu kho kan har nak cu a si. Kan zumhning a dik lo ruangah thi hlu hi Laimi nih kan i harh. Cucaah biahalnak a chuakmi cu; Pathian nih a hlimlam i mi caah tthatnak a tuah lomi zumtu maw thluachuah a peek deuh hna hnga a hlimlam lo i mi nunnak caah a thisen a hlumi zumtu dah timi a si. Credit: Aung Myint Thang