By Salai Lairamthang: NLD Party le Unity Government: NLD party nih pyitangsu huttaw ah thutdan 400 tluk ngah dawh a si. Tukum President thim khawhnak le cozah sernak caah a herhmi pyitaungsu hluttaw thutdan cu 322 lawng a si. A hlei le a hluat in a tei. A hui dih ti khawh zong a si. Kawlram mipi nih ASSK hruaimi NLD party nih thlennak lam an sialmi cu mipi nih fek thup in an dirkamh rih tinak a si.

Tlangcung miphun umnak zongah a hui dih ti awk a si. Kawlram ramkhel kongah expert a timi pawl, ramkhel kongah ka thei aa timi pawl, tutan cu an i palh cikcek. 2015 nak in an i palh a zual chin, Palh sawsawh hmanh a si lo, election hlan i an chimmi pawl kha ngai than hna sehlaw anmah hmanh an i zumh men lai lo ti awk in a dang. Tlangcung party nih a tei men lai tiah ruahchannak sawsawh in tlangcung party lei i thialmi tete zong an i palh diam.

NLD party nih cozah a ser kho ti lai lo. Coalition government ser a si lai. NLD party nih cozah a ser kawh ti lai lo caah, kan duhmi kan hal lai i a kan pek lawngah cozah ser kan bawmh lai tiah a ruahchan mi pawl le King Maker kan si lai” timi pawl ruahchannak le bang cu minmei bang an zaam dih ai.

NLD cozah nizan ah tlangcung party vialte sin ah ca an kuatmi a siseh, U Zaw Htay nih election hlan i a chimmi siseh, election hnu i NLD CEC chungtel, Dr. Myo Ngunt, NLD information chungtuan, Monywa Aung Sin le NLD research center i lutlai a rak tuanmi, Myo Yan Nawng Thein hna nih an chimmi siseh, a ra laimi NLD cozah cu “UNITY Government” si dawh bik a si.

Pyitaungsu vuanci ah siseh, ramkulh cozah sernak ah siseh, NLD party lawng si loin tlangcung party hna chung in a fitmi an i tel lai tiah zumh a si. A ngaingai tiah cun NLD nih tlangcung mi le party dang herh lo tein cozah ser khawh a si. Asinain tlangcung party hna he ikomh in unity cozah ser an timhmi hmuh tik ah 2021 pin lei ahcun atu nak in peace process, democracy le federal ram sernak caah an lohma a kal deuh hrimhrim lai tiah zumhnak ka ngei. A herh ahcun ralkap pawl zog an rengh cang hna lai tiah zumhnak ka ngei.