Wuhan khuapi in a chuakmi zawtnak Coronavirus kongah thiamsang vialte hna nih cun Tuluk cozah an lunghrinhnak hi nikhat hnu nikhat in akarh chin lengmang. Hi zawtnak nih hin kumpi kumhra chung cu ahnur suan lai tiah an chim. Hi konghe pehtlaiin Tuluk nih thilsining athuhnawh mi vialte hna cu Daily Mail nih atanglei bantuk in an phuan dih.

Nikum November ni 17 ah Tuluk cozah nih WHO sin ah Wuhan ah harsatnak an tong i, Pneumonia bantuk zawtnak thar a um ruangah sizung ah adam lomi hna cu chiah an si tiah an chim hna hlan zarhpi zarhruk ah hi zawtnak hi arak chuak cang. Hi kongah South China Morning post nih arak ttial cangmi asi.Hi lio ah hin kum 55 asimi pakhat hi zawtnak angei hmasa bik mi asi.

Amah hi sizung ah zawtnak ruangah chiah hmasa bik mi asi. Cun December ni 10 zongah Ngasa zuar pakhat Wei Guixian zong sizung ah an rak chiah. December ni 15 ah hin zawtnak angeimi hi minung 27 an phan manh. December ni 17 ahcun zawtnak angeithar mi hi nikhat ah minung 10 an phan cang. Cozah nih zawtnak angeimi hi an tlawmter.

December ni 18 ah kum 65 asimi pneumonia ruangah Central Hospital of Wuhan ah chiah asi i, amah hi Sa zuarnak hmun in sa ape lengmang mi asi. Demcember ni 24 ah Sa apawtu pa a Cuap chung i, a ummi an lak i, checknak an tuah.Hi an lakmi cu Visions Medicals Guangzhou i, Genomics Laboratory ah check dingin an kuat.

December ni 26 ah Hubei Xinhua sizung i, Respiratory Department hruaitu lutlai Zhang Jixian nih ttih a nunnak kong atheih.Hi zawtnak ruangah Sa zuarnak hrawng a ummi hna cu pakhat hnu pakhat in zawtnak angeimi an karh chin lengmang cang tiah a hawi le athanh hna pin ah nawlngeitu hna zong a chimh hna.

December 27 ah ttih a nunnak kong fiangtein an theih. Wuhan Central sizung i, Respiratory medicine hruaitu lutlai Zhao Su nih Guangzhou ah an kuatmi result rianrang in theih aduh caah phone hmangin thil umtu ning cang a hal hna. An chimhning cun coronavirus zawtnak thar asi tiah an ka tiah Zhao nih a chim. Ahnu ah thawngzamhnak pakhat nih alanghter tthan.

Zawtnak an checkmi Sa ape tawntu pa cu Wuhan Jinyintang Sizung ah chiah a si i, a hnu ahcun a nunnak zong a liam tiah an chim. Cun a damlomi mizaw minung pariat hna cu genomics company danngdang ah an kuat hna i, a result an hmuhmi cu aa khat dih a si. December 30 ah Wuhan Central Sizung i, Ophthalmologist Dr Li Wenliang nih group ah zawtnak thar a chuahnak kong achimh hna.

Hi bia a chimmi leng a chuah hnu ah Tuluk nawlngeitu hna nih ralrinnak zong an pek.Cutlawmpal ah Wuah Health Commission nih rianrang ngaiin theihternak atuah hna i, mizaw 27 an zawtnak kong a chimh hna. Asinain hi zawn ah Coronavirus zawtnak thar asi timi tu cu alanghter lo tiah an chim.Hi thanhnak tuahmi hi nawlngeitu hna nih an theih hmasa bik mi bia asi.

December ni 31 ah Tuluk nih WHO sin ah zawtnak theihlomi a chuak timi kong an chimh. Asinain i chawnh khawhmi zawtnak tu cu asi lo tiah an chim. WHO zong nih thiamsang hna dottletnak tuah dingin a tlah colh ve hna.Hi thok in Police hna nih thanhnak an tuah i hi zawtnak kong a chimmi minung pariat hna cu dottletnak tuah an si tiah an chim.

An mah hi Sibawi lawngte an si hna i, an mah chungah Wuhan Ophthalmologist Dr Li zong aa tel. Thawngpang diklo asi i, minung 27 zawtnak angeimi hna hi zeibantuk zawtnak dah an ngeih timi theih an si rih lo i, hi zawtnak hi khamhkhawhmi asi tiah an langhter.Tuluk ah a cangmi thil hi Taiwan nih a theih caah WHO sin ah ca akuat colh.

Hi zawtnak hi Taiwan nawlngeitu hna nih cun i chawnh khawhmi zawtnak asi timi hi an rak theih diam cang.Asinain WHO nih cun zeibia hmanh lehnak atuah hna lo. Tuluk nih Taiwan cu a sual taktak mi ram an si i, an chimmi hi ruahding ngaingai a um lo an rak ti. January 1 ah nawlngeitu hna nih sa zuarnak hmun cu an khar colh.

Communist Party tangah a ummi Xinhua News Agency nih a chimmi hi bazar hi tharchuah asi lai caah khar asinak hi a si tiah a thanh. Police nih mipi hna cu biachokvai zeihmanh thanh hlah uh tiah an khap hna i, nawl azul lomi cu zohsawh nan si lai lo tiah an ti rih.Cun Caixin News Agency nih alanghter mi cu Buei Provincial Health Commission sin ah Genomic Company pakhat cu theihternak a tuah.

Zawtnak konghe pehtlaiin dottletnak an tuahmi vialte hna cu ngol dih dingin nawlpeknak ca cu a sin ah arak phan. Result vialte zong lengah chuahter lo dingin theihternak an tuah tiah alanghter.January nithum ah National Health Commission nih Institution vialte hna sin ah order a chuah. Mipi hna sin ah zawtnak theih lomi kongkau ah theihternak tuah lo ding le checknak an tuahmi vialte hna zong cozah thimmi hmun ah nan kuat dih lai. Nan kuat lo ahcun nan hrawh dih lai tiah ati.Hi ni lila ah hin Dr Li zong police nih an thlah ve.

January 5 ah Shanghai P3 Laboratory i attuanmi Zhang Yongzhen le a ttuanpi hawi hna nih minung taksa ah virus acawlcanghning vialte an theih dih. Cu hnu ah an hmuhchuahmi thil kongkau hna NHC ah an chimh hna i, hi zawtnak cu thaw in i chawnh khawhmi asi tiah an ti hna. January nikua le nihra ah Wuhan Health Commission nih kum 61 asimi Zeng cu athi tiah an thanh.

Amah hi sazuarnak bazaar ah akal lengmang mi asi. Cun ninga aliam hnu ah a nupi zong zawtnak angei tiah an chim. Asinain Tuluk cozah nih cun i chawnh khawhmi zawtnak asi timi fianternak aum lo tiah an chim. January ni 11 ah Hi zawtnak an hmuhmi konghe pehtlaiin Shanghai P3 hna cu lehnak zeihmanh an tuah hna lo.

January ni 12 ah Shanghai P3 Laboratory zong ahnu ahcun phihkhar asi i, An kharnak aruang cu hi zawtnak kongkau hi an thanh sual lai ti an phan caah asi tiah an chim.January ni 13 ah Thailand cu Tuluk lengah zawtnak angei hmasabik a si. Amah hi Wuhan in Thailand ah a kirmi asi i, hmundang ah an chiah colh. Asinain Tuluk State media nih cun ramleng ah zawtnak akarh timi an thanh duh hlei lo.

January 14 ah WHO zong nih hi zawtnak hi minung cungah i chawnh khawhmi zawtnak a si timi hi fianternak pakhat hmanh aum lo tiah an rak thanh. WHO cu Tuluk hruaimi a si tiah an chim. January 20 ahcun biadik thanhnak an tuah cang.Kum 83 asimi Zhong Nanshan nih State media ah zawtnak hi i chawnh khawhmi zawtnak asi tiah aphuan. Asinain a tlaimanh cang.

January ni 23 ahcun Wuhan an phihkhar. WHO zong nih hi zawtnak cu i chawnh khawhmi zawtnak asi timi an cohlan ve.Cuh ahnu ninga arauh hnu ah vawleipi theih in thanhnak an tuah. January ni 24 ah Tuluk nawlngeitu hna nih biachokvai chuahter lo dingin amipi ahro hna. Cu hnu ah Toronto University ah dottletnak atuahmi an chimphuan ruangah tangka an cawiter hna pin ah minung 40 renglo an tlaih hna ti asi.

January ni 26 ah Wuhan Mayor Zhou Xianwang nih aharhmi thil i thanh angah lo caah ka rian i dinh ka duh tiah a rak chim.Ahnu ah a chim tthanmi cu Wuhan phihkhar asi hlan ah hin chungkhar milion hna nih khuapi an chuahtaak i, hi hna pawl ruangah zawtnak akarh khunnak hi asi lai tiah a chim tthan. January 30 ah WHO lutlai Dr Tedros nih Twitter ah tuluk hruaitu hna thangthatnak kong a chim i, zawtnak an dohnak cungah an thatnak kong a chim.

February 7 ah Coronavirus ruangah Dr Li Wnliang cu a nunnak aliam. Hi ni lila ah Chinese Human Rights lawyer Chen Qiushi cu hmundang chiah asi tiah an thanh. Zawtnak kongah athanh ruangah asi ti i, tuchun nitiang a umnak an thei lo tiah an chim. February 26 ah Video Journalis Li Zihua cu aho ti theih lomi nih akal pi i, a umnak theih asi ti lo.

March 4 Xinhua News Agency nih thawngzamhnak catlap hmaisa ah Tuluk cungah vawleipi lawmhnak in an khat. Tuluk aa pumpeknak hi tthawng hlah sehlaw vawleipi nih coronavirus doh dingah hin caanttha an ngei lem lai lo tiah a ttial.Asinain thilsining a chuahning he cun akalh ti asi.Tuluk thatlonak achimmi dantatnak an pek ngai hna. Cun akonglam theihlo in a tlaumi zong an um rih hna.

Cun Tuluk mirum taktak a simi kum 69 a simi Ren Zhiqiang le Law Professor Xu Zhangrun hna zong khoika hmanh chuak kho lo dingin an tlaih hna. Cun Chawlehnak lei minthang Fang Bin cu khua le mipi adohtu hna mipi kut ah nawlngeihnak pek si cang seh tiah Social Media ah a post hnu ah a umnak theih loin a tlau.

Note asau deuh caah atawi deuhnak in kan vun langhter. Credit:TK (Chinlungpost)