Tuluk le Myanmar ramri in Labutta khua ah a rak kirmi mizaw nu pakhat cu khuami nih khua chungah an luhter lo caah siizungah an chiah i sibawi te nih an thlop bul a si tiah theih a si. Zaangfaak ngaingai a si ko.

Kachin ramkulh, Moe Mauh khua i rianṭuanmi nu pakhat cu zawt fah dam lonak ruangah sizung ah a va piah i January 21 in February 2 tiang sizungah thlopbul a si. February 2, 2020 ah sibawite an chek ṭhan i nan khua lei na tlung kho cang tiah tlunnak nawl an pek. Asinain, a zawtnak hi atu lio zawtnak ṭihnung Wuhan Virus he aikhah tuk ruangah khuami hna nih an khua an luh an sianh lo.

Cuti luh an sianh lo tikah cun Lautta sizung ah thlop dingin an kalpi ṭhan ti a si. Cu kong he pehtlaiin Labutta sizung ah sibawi rianṭuantu Dr. Hnin San Oo nih mipi sinah fianternak hitihin a tuah; ” Minu hi tuluk ramri in a rak tlungmi a si hleiah a zawtnak hi atu lio zawtnak ṭihnung Wuhan virus he ai khawh tuk ruangah atu bantukin khuami nih an cohlan lo hi a si men lai. Amah hi a zawtnak ni 14 chung zohkhenh a si cang i tlun an sianh hnuah khuami nih an rak cohlang lo i sizungah luhpi ṭhan a si” Labutta township sizung i sibawi rianṭuantu pakhat nih cun a chim.

Mizaw nute cu Labutta township sizung ah chiah ṭhan a si i cu ka ahcun an zohkhenh lai i aṭhat hlei lo a si ahcun sizung sang deuhmi ah ṭhial a si lai. “Keimah ruahnak ahcun mizaw (dam lo) nu hi Wuhan Virus (Coronavirus) cu a ngeih lai ka zum lo. Amah hi a khuh tuk i akhuṭhnak ah a ba ngaingai. A cuap lei kan zoh tik zongah aṭha fawn ko. Atu hi sizungah khandang te ah chiah a si zohkhenh a si” sibawi U Chian Kyi nih cun a chim chap ve.