Tuluk in a chuakmi mithmuh loin a vakmi zawtnak hrik ṭhalo nih tulio cu kan vawleipi hi awlokchong lakin a tuah ko rua. Greek mifim pa Socrates nih “fimnak taktak cu zeihmanh ka thei lo timi i theih khi a si” tiah a rak chim bal. A chim duhnak fian colh kha a har pah.

Nain, Greek mifim thotho Aristotle nih, “tam deuh na theih deuhah, na theih lomi a tam zia na theih chinchin lai, mah sining i hngalh kha fimnak hramthawk cu a si” a hun ti tikah a hun fiang deuh ngai. Cucu Tuluk mifim pa Confucius nih, “theihhngalhnak taktak timi cu kan theihngalhmi hi ri a ngei timi kan i theih ah khin asi (true knowledge is when one knows the limitations of one’s knowledge) tiah a hun chap tikah a hun fiang khun.

Hi hna hi Jesuh chuah hlan i, kan vawleipi a hnintu kan mifim minthang ( philosophers) kha an rak si. Tulio zawtnak hrik ṭhalo kongah kan vawlei kan mifimthiam hna cu an fimthiamnak dihlak chuahin chunzan it loin a khamnak sii an kawl, nain a har ko rua. Mi a singsing in sizung an phan, mi a thong in an thi duahmah, ram tampi cu siibawi le sayama zong an i za lo, thlopbul le i hlawm-awk ṭha loin an um.

Ram tampi cu an sianginn an khar dih, an zung an khar dih, khual tlawnkal an i khap, tonpumh an i khap, an sipuazia fakpiin a tla, a nuai-thong singsang in phaisa an sung––khuaci kan mui, thinlung a mui! Mi tampi cu an thin a phang, an thla a lau, an tha a ther, zeitikdah a kan phak ve te lai, an ti. Zan zong an i hngilh kho lo. Kan vawleipi hi a ngan a fak i a hrum-ai, kan ti deuh ko lai––a poi ngai.

Biahalnak cu: “vawlei fimnak a sang, kan ti. Thiamnak a sang, kan ti. Thlapa hna kan kai. Ziahhen mah zawtnak sii hna cu chikkhat ah an ser khawh ne lo” ti hi asi. Jesuh chuah hlan i kan vawlei mifim hna nih, “minung nih kan fim, kan thiam” kan timi hi cu baunak a um zia le ri a ngeih zia” an rak fiantermi kha a phi cu asi ko rua lai.

Minung leiin kan fimthiamnak a bau zia kan i theih ahkhin a lian-ngannak le a thil ti khawhnak a thuh-sanning a langmi kha a um tawn. Liamcia kum 6 lio Malaysia vanlawng a tlau lioah mah he aa pehtlaimi ka status te kha tuni a hun lang ṭhan. Tawite ka hun chap. Salai Van Lian Thang