Myanmar National Institutes of Health (Yangon) nih thawng an thanh ning in ramchung hmun kip in hlathlainak tuah a si. Hi hlathlainak tuahnak ah hin mizaw 393 chuahpi an si. Mizaw 393 chung ah hin minung 12 hna nih coronavirus an ngeih tiah theih a si. A dang a tangmi minung 381 hi cu zawtnak an ngei loh tiah an chim.

Nihin cacawn nithumni 15 April 2020 zing suimilam 8am ah an thanhning in Myanmar ramchung ah coronavirus (COVID-19) zawtnak a ngeimi minung 74 an tling cang ti a si. Zawtnak a ngei tiah hmuhchuah tharmi minung 12 hna cu an mah he ai tlakmi sii inn ah kalpi colh an si. Hi zawtnak a ngeimi hna hi an herhning paoh in zohkhenh ding in timhtuah piak an si tiah an thanh chih.

Hmanthlak kan chiah chih bantuk in Myanmar ramchung ah zawtnak a karhning fiangte in zoh khawh a si. Hi bantuk in Myanmar ramchung ah coronavirus zawtnak hi a karh chin lengmang ah cun mipi caah thinphang ngai a si. Cu caah a si khawhchung in mipi he ai hlatnak ah tthutdir khuasak kan hau. Zawtnak ngeih hnu ah ngeichiah chawva dih umek in i zohkhenh le i thlawp i zuan hnah nak in ngeih hlan ah i ralrin hi a ttha deuhmi a si. Ref: Khumiland News