Salai Williams Hlawnceu: Nihin Chinland ram caan zingka sml 6:00 tluk ah motor paruk khat tein Khuathar le Halkha thar karah ralhrang a rak ngalh hna i, motor tucu khuachung leiah an kir cang hna.

Motor paruk nih a rak ngalhmi hna ralhrang hna hi kee in Timit leiah maw an kal lai, silo cun Timit hleidonh ding thilri phor tu ding motor hna lamlak security lak piaktu zong an si kho fawn caah Timit le Halkha kar cu uico neh lawngte si lai caah i ralring ko ulaw tiah hun nolh chap ka duh ko.

Nihin 29 July thok in, Halkha le Timit kar ah chawhvah le umkal i ralrin ding si lai. Timit hleidonh ding kee kal ralhrang hna cu, Timit phak hlan deuh ramlak ah an i thup/dup ko rih, nihin or Thaizing ah hin Halkha in Timit lei ah ralhrang hna nih hleidonhnak thilri hna cu, motor in an kalpi lai. Mah thilri phor motor cu ralhrang nih an zulh lai caah Timit le Halkha kar ah mipi nan umkal lo ah a ttha bik.

Thawngpang dang: PDF Lemcang In SAC Ralkap Sin Thawngpetu Pakhat Cu Bago PDF Nih An Tlaih!: Bago ramṭhen, Bago peng ah PDF ralkap lemcang in SAC ralkap sinah thawngpang a thanhtu minung pakhat kan tlaih, tiah Bago PDF nih nihin July 28 ah cathanh an chuah. PDF nih an tlaihmi cu Civil-PDF in ṭuanvongeitu pakhat si mi ralkap San Shia a si, tiah an thanhmi ah cun an langhter.

San Shia cu Bago khuachung cawlcanghnak ah aa tel mi a si i, “Khuachung um a him lo” ti in July thla lai hrawng ahkhan Kayin ramkulh chung tlangcung hriamtlai phu umnak hmunram ah a zaam tiah theih a si. Hmundang i a zaam tikah a hawile PDF nih an lunghrinh i checkhlatnak an tuah. San Shia nihcun Bago um hriamtlai phu hna cawlcanghnak vialte cu SAC lei ṭangmi Han Ngein Oo telegram channel ah thawng a rak peknak hmuh a si tiah Bago PDF he naihniam in ummi nih an chim.

A luancia July 7 i Bago mino 9 tlaihkhih an rak tonnak zong San Shia ruangah a si lai tiah Bago PDF cheukhat nih cun lunghrinhnak an ngei. Bago PDF nih Bogo tualchung hriamtlaitu phu dang hna cu San Shia aa telnak CPDF he pehtlaihnak tuah lo ding in an chimhruah hna i, tlaih a tongmi CPDF chungtel San Shia cu dan kan tat lai tiah Bogo PDF nih cun an langhter.