Vawileipi nih a cuanh cuahmahmi US rampi thimnak cu buai lei a panh chin lengmang. Thawngpang fiang ngaingai von theih ding zong a har ngaingai. Atu tiang an dirhmun zoh tikah, Joe Biden nih teinak a hmuh rih ti hi a si.

President a ṭuan liomi Trump zong nih ka sung tiah a sungh khan duh ve loh. Vote dik lo a um. An thil tuahmi hi a dik lo tiin a doh i hlathlainak a tuah cuahmah ve. Tutan thimnak kong h pethlai in Trump nupi hmasabik Ivana Trump nih a hmuhning a chim ve.

Ivana Trump,“Trump cu sungh a duh lo, a sunghnak duh lomi a si i lamkip dap in a dongh tiang a cawlcangh lai. Ka fale hna cu Innrangpi ah dam tein an hmuh i zalong tein nun an khawhnak ding hi ka duh piakmi hna a si. Trump a sungh taktak a si ahcun, i dinh pah in rili kam ah Golf a celh lai. Cucu a sungh taktak hnuah a tuah dingmi a si lai tiah ka ruah. Asinain a tu tiang rih ahcun biadik a chuah khawhnak hnga a zuam a hau rih,” tiah a chim.

Ivana Trump cu Donald Trump nupi hmasabik a si i kum 1977 in kum 1992 tiang an rak i um. Fa pathum an ngei manh i Ivanka Trump, Donald Trump Jr le Eric Trump hna hi an fale cu an si. Trump le Ivana an i ṭhen hnuah Marla Maples he an i um ṭhan i fanu pakhat Tiffany Trump an ngeih ve. Atu a nupi First Lady Melania cu a pathumnak a nupi a si.

Nizaan ah Trump nih a hitihin ca a taar,“US rampi thimnak cu dik lo ngaiin Biden nih teinak a co”tiah a taar. Cucu Biden a rak ṭanhtu pawl nih Trump zong nih Biden nih teinak a hmuh ti a cohlan cang tiin an i nuam ngaingai. Asinain a hnu tlawmpal ah Trump nih a ti ṭhanmi cu,“Dik lo tukin teinak a hmuhmi tiah an phuanmi Biden cu Diknak he keimah nih ka tei ṭhan lai,”tiah a taar ṭhan. Chirhchan:People Media