Trump: Electoral College nih Biden an Vote ah cun Office ka Chuahtaak ko lai. (Trump tanhtu pawl nih CNN nan huat tuk le tutan cu Fox News nih a tialmi bak seh kan dang hna)

President Trump: “Fawitein cun a sungh ka khan lai lo.”

Election College nih Biden an vote ah cun office ka chuahtaak ko lai, tiah Trump nih Thursday ah khan a chim. Asinain, cu ve rualrual in vote rel lio i tamtuk vote fir a um, tiin a zumh caah tazacuainak (legal fight) pehzulh rih dingin biakamnak a tuah.

“Electoral college vote ah hlawh na tlin ti lo ah cun office na chuahtaak lai maw?” tiin Thanksgiving ni i ralkap pawl he teleconference an tuah lio ah thawnglatu pakhat nih a hal i, “Ka chuahtaak lai ta… ka chuahtaak lai, ti cu na theih ko cu ta,” tiin Trump nih a leh.

“January le nihin kar ah thil tamtuk a cangmi a um,” tiin State tampi i tazacuainak a dotdot in a tuahmi kongah Trump nih a chim. “Fawitein cun a sungh ka khan lai lo,” tiin Trump nih a chim chap. “2024 ah khin teh Republican aiawh in zuam than nai tim lai maw?” tiin thawnglangtu nih cun a hal i, “2024 kong hi cu a chim ka duh lem rih lo,” tiin a leh.

Georgia ah hin GOP Sen. 2 David Perdue le Kelly Loeffler hi an term a dih chom ding a si i, a tu hi nawlnolh in ai zuam than ding an si. Sen. 2 ca i campaign tuahpiak dingin Saturday ah khin Trump cu Georgia lei a tlawng lai, tiah theih a si.

“Georgia nih Biden mithmaitha pek in election namhnehnak an tuah hnu ko ah hin, kan vote an kan firpiakmi kongah mipi an lungrawhnak a zual chinchin,” tiah Trump nih a chim.

Georgia, Michigan, Pennsylvania le Nevada nih tutan zarh i election result namhnehnak an tuah hnu cun Trump legal team cu sungh lawng an rian ko cang. Georgia election results namhnehnak an tuah cangmi kha let than i Trump tu teinak pek dingin attorney Sidney Powell nih Wednesday ah khan tazacuainak a tuah.

Taza an cuai hnawhchanmi hna ah hin Georgia Gov. Brain Kemp le Secretary of State Brad Raffensperger zong an i tel ve. Hi hna pawl nih Constitution an buar hi a voi a tam cang, a dikmi tehte kan i ngeih ko. Mithiamsang tehte siseh, cun election results kongah a sikho lo mi thil ummi kong zongah tehte kan i ngeih ko, cun Biden mithmaitha vun pek khawhnak dingah a zatawk ko lai, tiin vote a thong a sang in an mersan fawn, tiah taza an cuai hna.

Election hi keimah tei a si, tiin Wednesday tiang zongah cun Trump nih a chim peng ko rih. “Tutan election hi hlen a tong, cu bantuk thil cu kan onh lai lo. Cu bantuk thil kan ram caah kan onh kho lai lo. Pennsylvania le hi swing states vialte ah hin vote tamtuk in teinak kan hmuh ko caah, hi election hi a hnuhmai kan merter awk a si,” tiin phone in Penssylvania Senate Majority Policy Committee sinah Trump nih a chim.

“Vote fir a um, ti i kan lungre a theihnak kong hi nolhcip le pehtlai tein langhter dingin Trump campaign nih kan i ngeihmi caantha vialte an kan hnonpiak dih,” tiah Pennsylvania i mipi sin biachimnak ah Trump a sihni Rudy Giuliani nih a chim.

“Timhciammaam tein vote firnak tuah an duh ruangah mail-in ballots an i hmaithlak,” tiah former NY mayor zong nih a chim. Fox News (Chelsea Bawi)