BAWIPA THIMMI AVOI 45NAK LE AVOI 46NAK USA PRESIDENT: Tutan avoi 46nak USA President thimnak kong cu mikip buaicurh cio a si ko. Pu Van Ceu Uk Khenglawt zong nih tuan deuh ahkhan Donald Trump nih a tei ko tiah a rak ti manh cang. Nizan ahcun a sung cang a hun ti țhan. Trump nih a tei cang tiah a ruat i a sung țhan a timi tampi an um. Chikhat kha cu Biden a țanhtu lei zong nih Biden a sung cang tiah an ti manh ve. Nihin ahcun Donald Trump a țanh ngaimi Lai media le Mizo media cheukhat hna zong an lung a dong cang hna. US thimnak kong hmanh țial a zuam ti lo mizawng an um. Anmah party Republican upa cheukhat hna zong an lung a dong cang. Thil umtuning zoh tikah Pu Trump a sung cang an ti cio, nan ti cio ko.

BAWIPA THIMMI LE BAWIPA HNATLAKPI AA KHAH LO NAK: Rom. 13:1 kan zoh ahcun nawlngeitu, uktu hna hi PATHIAN hna tlakpi mi an si ti kan hmuh. PATHIAN hna tlakpi timi le BAWIPA nih thimmi ti hi an i khat lo. Siangpahrang Saul le David ti bantuk, AMAH BAWIPA nih cucu khakha siangpahrang siseh tiah a thimmi hna kha an um i cubantuk hna kong ahkhan cun AMAH BAWIPA hrimhrim nihkhan a thimmi hna an tlin khawhnak hnga aa thlak i rian a țuan tawn. A thimmi hna nih a duhnak an tuahkhawhnak hnga a THLARAU in an thlarau/ thinlung cu a hninh tawn hna. Hrințhan le hrințhan lo he aa pehtlai lo. Persia siangpahrang Sairas cu a hrințhanmi a silo, Sihmanhselaw PATHIAN nih Babilon saltang Israel mi hna bawmtu dingah a thim i a thlarau zong a hninh tawnmi a si ( Isaia. 44:28; 2 chan. 36:23).

AVOI 45NAK US PRESIDENT LE JERUSALEM: Ronald Reagan thokkhan US President hna hi ka hun theih ve hna. Bush te pafa, Bill Clinton le Obama tibantuk hna kha PATHIAN thimmi si loin, PATHIAN hna tlakpimi an si hna. Ram mipi nih an thim mi hna kha PATHIAN zong nih a hnatlak pi hna. Sihmanhselaw, avoi 45nak USA President a țuantu hnga ding cu, pakhatnak, PATHIAN program in a kalmi Israel nih Independent a hmuhnak in kum 70 a tlinnak kumah, “Jerusalem cu Israel khualipi a si,” tiah a phuangtu ding; pahnihnak, den a duhmi hna a dengtu ding a si caah, Muslim ram pawl an hmai a zoh lo mi le miralțha pa kha BAWIPA hrimhrim nih a hun thim i cu mipa cu Donald J. Trump hi a si. Cucaah avoi 45nak USA President ah zumhlo ngai le ruahlo ngai in a hungtlin kha a si.

Ezekiel. 3:8 “Nangmah cu anmah he aa tluk ah kan ser lai. Ningzah an hngalh lo tluk le an lung a khon tlukin nangmah zong kan hahter ve lai kan khon ter ve lai. Na cal cu teklung nak hak deuhin kan ser lai,” tiah, BAWIPA nih a ti. 2016 lio ahkhan, avoi 45nak USA President ding ahcun Jer. 51:20 bantukin PATHIAN sobul a si ngam ding hruaitu an si a herh ka rak ti. A ruang cu Muslim pawl an hrang in an ngan thluahmah cang. Vawleicung hruaitu hnaah anmah a van er ngamtu an um huaha hna lo. Cupin ah PATHIAN zei ah a rel lo i mahlawrin a rak lawrmi hna kha an tam tuk cang. Cucaah Hilary Clinton le Donald Trump ah a hodah PATHIAN sobul a si ngam lai ti kha ka ngiat hna i Donald Trump caah hin thla ka rak campiak.

AVOI 46NAK USA PRESIDENT LE NI HMANUNG THLARAU RAWL ȚUAN: Avoi 45nak USA President cu PATHIAN sobul milungțhawng Donald J. Trump a si. Sihmanhselaw avoi 46nak USA President ding cu, 2The. 2:6 i Mițhalopa ( antichrist) a khamtu Khrihfabu hna a bawmtu ding le Isaiah. 44: 28 bantukin PATHIAN nih a aiawh in uktu dingah le a duhnak tuahtu dingah a thimmi kha a si caah, Trump le Biden ahhin aho nih dah Khrihfabu a dirhkamh deuh lai? A fiang tuk ko, Donald Trump hi a si ko.

Cucaah avoi 46 nak USA President ding cu mipi nih thim i PATHIAN nih a hna tlakpi mi si loin, PATHIAN nih a Khrifabu hna bawmtu ding caah le Matthai. 12:29 bantukin Mițhawng pa a țemtu le thlarau tlau tampi hna khamh an si khawhnak hnga, caan țha a um khawhnak hnga, Antichrist a khamtu ah BAWIPA nih a ruah cang i a thim cangmi a si. Cucaah Antichrist nihcun a thazang dihlak chuahin doh le thlak aa zuam ve. Cucaah tutan USA election hi voidang he aa khat hrimhrim lo nak hi a si. Zeitluk indah thurhhnomhnak a um cu nan theih cio ko. Khuachia rianțuannak zeitluk indah a tam?! Cucaah THIANG THLARAU nih KHRIH Ralkapbu hna cu hehchet tiah thla a camter ve hna hih!

Cucaah, Biden a tlin cang le cang lo hi biapi a si lo. BAWIPA nih ahodah a thim tihi a biapi cu a si. Hi kong ahhincun Political Science a cawngmi mifim pipi hna zong an i palh cikcek ko lai. BAWIPA PATHIAN cu aho nihdah a kham in a donh taktak khawh lai? Swing State biaceihtu hna le nawlngeitu hna le Mainsteam media hna nih tah an kham kho lai maw? Naisai hlah! Thlapa cung hmanhah kai hna selaw BAWIPA nih a țhumh thiamthiam ko hna lai. Cun, PATHIAN nih a thim mi cu President a si thiamthiam ko lai.

CHINMI NIH KAN I PALHMI: Obama nih Refugee tampi a kan lak. Trump nihcun a kan phih nan ti. Nan palh cikcek. BAWIPA nih an kan awnpiak i BAWIPA nih a kan kharpiak țhan cang caah a si. Obama le Donald Trump ah a si lo. BAWIPA nih a herh ahcun a mi Israel mi hna bawmtu dingah Izipt siangpahrang Faroa zong a hman ko. USA nan phak hi Obama ruangah siloin, kan harsatnak a kan hmutu BAWIPA kan PATHIAN pei a si cu.

BAWIPA nihhhin Chinmi Malaysia le Delhi te hna i a ummi Chinmi hi an philh hna lo. Sihmanhselaw, BAWIPA nih zeidah an timhpiak i khawzei umdingin dah an duhpiak tihi nan ruat bal maw? Myanmar ram zong BAWIPA nih a thlen lai i US hmanh in a hung kir țhanmi an um te lai. Credit: Apostle Tluang Lian (Martar)