Falam ca in ttialmi a si ko caah anmah ttialning tein kan vun tar. Pu Do le Pu Den Thuthar (20.11.20) Amerika hrilawknak cu zarh thum zik a si thlang nan rizal felfai a suak thei hrih lo. Media-pawl cun Biden in a neh an ti nan thungai ah cun Electoral Voter 270 ngah dingah Trump 232-228 Biden tiin an tang hrih sawn a si. Asinan vote tla mi zoh ahcun, a tang lai mi EV 78 umnak State 6 ah hin Biden in hmai a hruai thluh ruangah a si. Nidangah cun hrilawknak ah vote dik lo malte khal a um ti hmuh a si ahcun nehnak pek an si dah lo. Tu cu Trump lam cun tampi hmuh a si an ti.

Ziangah Media lamin Biden an ṭan tile an agenda tampi a bangawk ruangah a si. Cuhleiah America Journalist hi 7% lawng Republican an ti-aw ih 47% cun Democrat an ti-aw ti a si. A dang cu Independent ah an salaw. Media Company tumpipi neitupawl hi Global agenda nei an si deuh thluh. Facebook hin Trump in a neh ti lam le ‘dispute(elawk mi), misinformation(thutheihnak dik lo) tiah a ngan ih Biden in a neh ti lam le zianghman a ngan(flag) fawn lo. Hikhal elawknak nasatak a suah ruangah tuini tiang buai a si. Jim Jordan cun kum 4 sung rori Russia Collusion tiin thuphan rori cawl loih phuangtu media-pawl thuthan cu ziangtin kan zum thei ding a ti. Kha laiah khal Evidence pakhat hman um lo rori mi cu thudik vekin an phuang a ti.

Cuhleiah Facebook, Google le Twitter pawl hi Democratic State- Sillycon Valley, Carlifornia ih hrambun an si hai ih Facebook hnaṭuantu 93% le Twitter hnaṭuantu 98% cu Democrats an si. Hi hi kan dung zan Senate hearing an neih ih an rel mi a si ih Fact-check an tuah mi tampi hi an tisual thu an pawm. Platform vekih ruah an si ruangah Section 230 thawn kilhim an si ih taza cuai theih an si lo. Asinan hiti an ti vivo cun 230 ṭhiah a si ding thu Senate Judiciary Committee Chairman Lindsey Graham(R) cun a sim hai. Facebook in voter fraud a um dah lo a ti nan tihni sun khan California ah mi pahnih cu dan loin vote 8000 register an tum ruangah Voter Fraud case thawn kaih an si.

Thuthar lamah lut sehla: Trump Team Press Conference ah Trump ih sihni Rudy Giuliani cun, “Fianternak evidence kan neih mi hin hrilawknak rizal a lingletter ding” a ti. Mi complian-nak an thehluh le a dik lo an report mi hi Library khatih ret ding a um a ti fawn. Trump lawyer team ih Sidny Powel khanin, “ vote zate ih kan thenfai ahcun Trump in nasa takin(landslide) in a neh ding” a ti.

Trump team hin court ih an khin mi zate ah hin an neh thluh lo nasa. Thubuai 26 sungah 15 an sung ih 2 hrawng an neh zo. Tu hi case 7 hrawng an thun bet leh ding. Meida tumpawl cun hi Press Conference hi an live duh lo. Thuphan hlir an ti. Neta ih an ngan mi sawn cu a thu hnakin a biangih a thlan luang sawn kha an buaipi! Giuliani in vote diklo a kut rori in a hmuhtir nan media tumpawl cun an ngan duh lo hleiah bulhram nei lo an ti lai thotho.

Georgia-ah hin vote siarsal an ṭheh zo ih rizal an phuang hrih lo. Biden in mal laiih hma a hruai thotho ding zum a si. Vote 5000 leng lo siar hrelh a si ih vote 800 leng lo umnak mermory stick pakhat rak kawm lo a si. Vote siar hrelhnak Board Director cu hlawn a si zo. Trump lam cun siarsal men si loin Signature a milaw maw ti zoh rori an duh. Georgia ah hin vote siar hrelh County 3 rori ah an hmusal si khawh Breaking Hot News ding rori a si nan media tumpawl cun an tarlang duh lo. Keimai ka ngan hnu ni khat deuhthaw ah Fox News in a ngan ih cui hnu ah The sun le Skynews pawlin an ngan. CNN, NYT, Washington Post, BBC pawl tla cun zianghman an ngan lo.

Michigan ih Wayne County Election Board in Biden nehnak an pe lo lawk ih nawrnak a nasat tuk ruangah an pesal. Asinan ‘a dik lo thotho e’, tiin an hnukkir(rescind) sal. Hi county hi Detroit khawpi sehvel minung tamnak a si ih himi county tel loin Michigan ah Biden in a neh thei lo.

Arizona khal boruak a fel hrih lo. Boruak a fel tik le Trump boruak a ṭha ding tiah GOP Chair Kelly Ward cun mizan ah a sim. Wisconsin county a hrek vote an siarsal ding. Cumi hrangah million 3.7 hrawng Trump Campaign in an tum ding. Hiti vote an siar zikah Election Board in dan thleng an tum nan an hlawhsam tiah White House Press Secretary McEllany cun a rel.

Pennsylvenia, Allegheny County ah vote 2349 cun ni thla ngan lo a si ruangah hnawl dingin Judge in thu a ṭhen. Cun Republican lam vote siar zoh an sian lo mi an khinnak cu State Supreme Court in a hnawlsak. Cumi thu ah Giuliani cun, “ Vote siar kilven thu ah pi ziangzat ti a um lo tiin in hnawlsak. Hipawl hi Democrat duhzawngih thuṭhentu mi mumal lo an si. Dan cun, ‘ an zoh/kilveng’ ding a ti ih anni cun khan sungih um hnuhnu cun a tawk in ti tikah pi 1000 lai tla a si thei. Danih a rel mi cu an siar lai zohhliah ding a si. Dan loin thu an ṭhen” a ti.

A tawpnak ah Biden lam ṭantu media tumpipipawlin an duhdan ih thuthang an merhkawi vekin Trump lam ṭantu hrekkhat khalin duhthusam fake news an ngan mi a tam tuk ve. Fimkhur a ṭul. Thudik theih nan duh le ka ngan mi hi rak cuan ṭheu uh. Credit: Lal Lian Zual