President Trump Nih Martial Law Chuah Dingah Ruahnak Hal Hna. President Donald Trump nih ruahnak a petu hna cu a auh hna i martial law chuah khawh a si le si lo, martial law chuah ah zeidah a cang kho? martial law chuah in zeidah an tuah khawh timi le US phunghram ah martial law chuah khawh a si le si lo ceihmainak tuchun ah an ngei.

Martial Law chuah ding ruahnak hi General Michael Flynn nih a chuahpi mi a si. President nih martial law a chuah hnu ah ralkap nih a herhning in tuanvo an laak lai, White House ah Joe Biden lut lo dingah an kham lai.

Swing state 5 ah vote firnak le hrokhrawlnak a ummi vialte kherhhlai dingah special counsel caah Sidney Powell tuanvo pek an timh. Tuanvo an pek taktak ahcun voting machine pawl le vote firnak le hrokhrawlnak vialte an kherhhlai dih lai i, report an pek lai.

Martial law an chuah taktak ahcun vote thlakning le vote relning a buai tuknak, Battle ground state 5 ah thimnak a thar in tuah a si kho men. Asinain US constitution nih a onh taktak le onh taktak lo fiang tein an chim kho rih lo. President Trump nih biachahnak taktak a tuahmi um rih lo.

US bawmhnak thawng-President Trump nih congress palai pawl cu US mipi nih stimulus check a tlawm bik, $1200 in $2000 tiang hmuh khawhnak dingah a forhfial hna. President Trump nih Republican le Democrats hruaitu pawl cu telephone a chonh hna i a rannak in approve tuah dingah a nawl hna. Congress [ Senate+House ] $900 billion bill an chuahpi mi an pass khawh ahcun US mipi nih cozah bawmhnak cu Christmas hrawng a si lo hmanh ah kum thar ah ngah cio a si te lai.

Atu tiang Democrats le Republican hruaitu hna nih a tlangpi in an lungtlin mi cu $600 lawng a si caah President Trump nih a tlawm tuk a ti. Covid-19 zawtnak cu mipi nih tuahmi a si loin, China nih a tuahmi a si caah mipi nih cozah bawmhnak hi an co ding hrimhrim a si” tiah a chim.

Senator, House representative pawl cu weekend zongah idin loin meting an tuah. Tuchun ah hin cozah budget zong an thlak a hau, an thak khawh lo ahcun tuzan zamtim 11:59: PM ah federal cozah zung vialte an khar chung lai. Source: Salai Lairamthang

Martial Law he pehtlai in rak rel chih-Trump nih Martial Law a hman tak sual lai maw? “Martial Law” timi cu a fawinak in Ralkap/Army kha caan karlak nawlngeihnak pek chung khi a si. 1958 lio, U Nu chan ahkhan Burma ram a rak buai tuk ruang caah U Nu nih Burma Ralkap/ Newin cu caan karlak nawlngeihnak a rak pek bal.

A fawinak in Martial Law a rak hman ve ti khawh a si. Cun, Ralkap nih uknak cu an lak i, 1960 election an tuah i U Nu cu PM ah a tling tthan. Asinain Newin/ Ralkap nih Kum 2 chung uknak/nawlngeihnak a rak tlaih kha a lem i, 1962 ah amahte in Martial law declared a tuah i, Kum 12 chung, 1974 tiang Martial Law in a rak kan uk.

Trump cu Michael Flyn nih Martial Law declare tuah dingin ruahnak a pek i, a lung ah a lut ngaingai tiah nihin news ah a chuak. Nihin ah a top advisors pawl cu, Martial Law declared tuah khawhnak lam a um maw? tiah a hal hna tiah biavaivuan a chuak.  White house lei belte cun chim-phuannak a um rih lo.

Trump cu Joe Bidden nih electoral vote lawng siloin, popular vote hrim in, 7 millions bakte in a tei. Nain Trump nih fir le ningcanglo vote ruang ah a si tiah a chim. Asinain, Joe nih a tei tuk palia i election result thleng kho ding a si lo.

Trump nihcun mailed/cakuat in vote mi, election Ni hnu ah a phan mi paoh rel lo dingin aa zuam nain, a hlawh a tling lo. Cucaah, Martial Law declared tuah in, a thar in thimnak/election tuah tthan lawng hi lam a ngeimi a si i, sungh a nautat tuk caah, Martial Law cu a declared tak sual hnga maw? Source: Zasang Cinzah