Trump: “Keimah ka Hal Hlah , China vung Hal!” Thawnglatu Asian American pakhat nih Monday ah Trump bia a hal. “Keimah ka hal hlah, China vung hal” tiin thinhung ngaiin Trump nih a hun leh i, lo diam a chuahtak diam hna. “Coronavirus test tuahnak kongah American hi vawleicung ah pakhatnak bak kan si” tiin Trump nih a innrangpi a velchum le a rose pangpar dum hau chungthluak in ca thar lulh.

April 27 hnu in tutan hi avoikhatnak press ah bia a chim a si. Virus test tuahnak kongah American hi vawlei cungah pakhatnak bak kan si, tiin zeiruang ah dah na chim? tiah biahalnak le lehnak caan an onh lio ah, CBS News aiawh in White House ah catialtu pakhat a si mi Weijia Jiang nih Trump cu a hun hal.

Cu na chimmi cu zeidah a thathnem? American mipi nifatinte an thih cuahmah kolio ah le a zawmi an karh chin lengmang ko bu ah, test tuahnak kong i vawlei pumpi na zuamcawh len mi cu zeiruangah dah a si? tiin a hun hal chap. Cu tham cu, vawleicung pumpi cul in cun pei an thih lulh cio ko cu. Na ka halmi hi China tu hal awk deuh a si. Keimah ka hal hlah. China tu va hal deuh ko. Na theih duhmi kong hi China na hal a si ah cun, cuhlan a um bal thenglo mi a phi na hmuh khawh men ko dawkaw, tiin Trump nih a leh.

Trump nih cun CNN thawngthanhtu Kaitlan Collins lei ah a hun i mer. Asinain, Jiang nih Presidnet cu a au bak in a hun hau hnawh than caah, Collins cu holh lo in a um than. “Sir, zeiruang thengte ah cun dah keimah sin thengte ah a tu bantukin na chim hi a si?” tiin Jiang nih Trump cu a hun hal than.

Minthlir in ahohmanh kan ti duhnak hna a um lo. Nan halmi bantuk dawhcahlo biahalnak a tuahtu paoh ka ti duh hna nak a si, tiin Trump nih a leh. Ka biahalnak hi dawhcahlo kong a si tung lo, tiin Jiang nih a ti than rih. Collins, CNN, nih cun biahal a hun i tim ve nain, inn hnunglei ah minung ton ding ka ngei rih, tiin Trump nih a ti i a chuahtak vurmar hna.

Trump hi press an tuah chiar te thawnglatu, abikin nunau pawl le miphundang pawl hi a namhnul deuh tawn hna. Jaing hi China ah a chuak ko nain kum 2 a si in US ah pempimi a si. Mizei rello le miphun thleidan pungsan in le thin bawhlok ngaiin Trump nih thawngthanhtu pawl a phomh hoi cang hna. Trump nih hin mithiamsang nunau pawl hi a tawlrel zia a thiam hrimhrim hna lo, tiin politic lei biachimtu Tara Setmayer nih a chim.

Maw kawi Trump aw, Asian American pawl zong hi American dawh kan si ve. A cheu cu US ralkap zong kan tla. A cheu cu coronavirus doh in siai he hmai a suangmi kan um dawkaw. A cheu cu thawnglatu Jaing bangin thawnglatu dawka kan si cu. Kan ram (USA) sawksam rian na tuanmi hi hun ngol ziarmar ko cang, tiin Democratic congressman Ted Lieu of California nih a chim.

US nih virus test kan tuahmi hi vawlei cungah a thawngbik a si. Kan nehsa hmanh an laam sual lo, tiin tuandeuh press an tuah lio ah Trump nih a chim. Minung 9 million test kan tuah khawh cang hna. A liamcia zarh 3 lio ah khan nikhat ah minung 150,000 test kan tuah hna i, a tu ah cun nikhat ah minung 300,000 kan tuah khawh cang hna. A rauhhlan ah nikhat ah hinak tamdeuh pi hi kan tuah khawh rih lai, tiah Trump nih a chim.

Tutan zarh chungah test kan tuahmi vialte hi 10 million lenglo an phan cang lai. Cucu S. Korea, UK, France, Japan, Sweden, Finland le a dang ram tampi hna nakin a lethnih tlukin test kan tuah khawh, tinak a si. Test tuah kongah S. Korea hmeteh a rang deuh tuk, tiin a chimtu an um len ve. Test tuahnak dingah states le peng le sang le miphun tete hna sinah $11 billion kan kuat cang hna, tiah Trump nih a chim. State hna ca i thazaang an chuahmi kong cu a chim ko nain, ram pumpi huapin zeitindah test hi kan tuah ning a si lai, timi kong belte cu a langhter fawn lo.

Test tuah a duh colh mi paoh cu, a tu bakah tuah khawh nan si, tiin hrih le hram dothlat lo piin Trump nih a chim. March 6 lio i a biachim bantuk te kha a si. Zeibantuk chan hmanh ah, harsatnak le tihnung lanh in America hi rian tuankho dirhmun a phan than zungzal ko. Rian hun awt than dirhmun cu kan phan cang, cho kan chuak cang, tiin Trump nih a chim.

Trump nih cun states tampi cu rian on than cio dingin thazaang a pek hna. Hi tih a nungmi raal hi kan tei hrimhrim lai. Kan economy kan nunter than lai i, lianhngannak lei kan panh chom lai. Cu bia le hla te cu nan hun theih chin lengmang cang lai, tiin Trump nih bia a kamh hna.

Democrats pawl cu an lung lawng a hring ko hna. Test tuahnak kongah buan kan co, tiin Trump nih a chim. Asinain, coronavirus a dironhnak kongah sungh lawng pei a renh ko ne hi. A si lo ding tiangin pei hi zawtnak rai hi a hmual a fahter lehlam ko cu, tiin Democratic National Committee deputy war room director Daniel Wessel nih cei in a hun phom colh ve.

State nih an duhherh ning tluk in test a tuahter khawh rih tung hna lo. Test tuah a duhmi paoh zong nih test an i tuah kho ne lo hi teh. Nihin i a thokmi karhlannak hi cu a liamcia zarh tampi tein a rak thok diam ding khi a si. Kan rian kan i liim, tiin Trump nih tlaang a tlir len lio ah American mipi cu an temtuar cuahmah ko rih hi teh, cucaah hnung a chit hna bantuk a si caah, a tuahsernak hi kan mipi nih an philhpiak te lai lo, tiin Daniel nih a chim.

Nikhat chung lawngah minung 5 million test kan tuah khawh chom lai, tiin Trump nih a chimnak ni 13 a rau cang. Test a duh mi paoh cu test khawh colh nan si. Nikhat chungah minung 5 million test khawh zau an si cang lai, tiin Trump nih biakamnak a tuah, tiah coronavirus war room director Zac Petkanas nih a chim.

Trump nih cu ti a chim lio tein a biachim hi a hman lo i, nihin tiang zongah a hman fawn lo. A hmanmi thil pakhat a um mi belte cu, Trump nih test tuahnak rian zei ah a rel lo ruangah minung 80,000 an thi. Kan President nih a tlam a tlinhmi pakhat te a um hnih cun tham cu, virus ruang i vawleicung a thimi vialte lakah America hi a pakhatnak ah a hun ser taktak ko (making America first).

White House lila hmanh cu pei virus in ai kham khawh ti lo cu. Katie Miller le Trump a bultawltu cu virus nih a tlunh cang hna. Cu rii cun Trump le Pence zong cu a nichiar in test an tuah hna. A dang cu Mask an i hruk dih. Trump lawnglawng an hrukter lo. Pence belte ai hruk lai le hruk lai lo a fiang rih lo. White House ah a lutchuakmi hi an tam lawmmaam. Kei belte cu an ka chonh ka zum lem lo, tiin Trump nih a chim.

Amah lila zong test tuah an hau cang va si kaw, test tuah hi zeitluk in dah a biapit ti cu Trump le a mithi lalaang pawl nih an I fiang ngai cang lai dah. Zeiruang ko ah cun dah test tuah hi American mipi caah biapi hla ah an chiah khawh bak hrih lo hi a si hnga? tiin Biden nih a chim. TheGuardian, UK (Chelsea Bawi)