President Donald Trump dirkamhtu minung a thongthong nih US thimnak vote ning cang lo le dikhman loin tuah a si timi kong he pehtlaiin Washington DC ah minung a thongthong nih lungtlinlonak an langhter. Hi duhlonak a langhtermi, mi zapi hi far-right group Proud Boys hna nih helmet le bullet-proof vest i hruk in an dirkamh ve hna.

November 3 i US thimnak ah khan Joe Biden nih hin atu dirhmun ahcun teinak a hmuh bantuk dirhmun ah a dir i, Georgia state-ah teinak a hmuh mi hi kum 1992 hnu in Democratic candidate-in Georgia ah teinak a hmuh hmasa bik cu Joe Biden hi a si. Mah ruangah Joe Biden nih hin electoral college vote 306 hmu in president si khawhnak dingah vote 270 a hmuh khawh hi si.

Asinain president Donald Trump nih nihini tiangah a sung timi pi a cohlang in a pawm duh ve lo. A biapi mi state tthenkhat ah dan-phunglam ning in cawlcang in vote an thlakmi ah a dik lomi a um tiah hlathlainak a tuah, sinain nihinni tiangah cu a tuahmi cu hlawhtlinnak ngaingai a um rih lo.

Washington DC-i duhlonak a langhtermi nih hin event min dangdang an hmang i, mah lak ah Million MAGA March- Trump nih Make America Great Again slogan a hman pin ah March for Trump le Stop the Steal DC hna zong an i tel. Trump dirkamh in duhlonak a langhtermi hna lak ah far-right Proud Boys pin ah Oath Keepers militia group hna zong an i tel i, Conspiracy theorist Alex Jones nih cun biachimnak zong a ngei. Hi duhlonak a langhtermi hna lehrul dingin left-wing lei phu nih lamzawh dingin timhlamhnak an ngei ve ti si.

Khat leiin a luancia cacawn nirukni i, election officials hna nih tukum US president thimnak hi “American history a hnin bik tu a si” ti chim in president Trump-nih a lunghrinhnak cu federal le state authority hna nih hnawlpiak. Hi ni tthiamtthiam ah White House biachimtu Kayleigh McEnany nih cun Fox news sinah, “President Trump nih hin President Trump a si tthan ding hi i zum in term hnihnak ka tlaihtthan lai timi aa zumh,” tiin a chim ve.

Hi kongah president Trump cu Biden teinak hi pawm cang dingin chimhchawnnak a tamtuk a don caah government agency General Services Administration (GSA) hna nih cozah thlennak a um khawhnak ding caah khuakhannak an ngei lai.