Fiang tein chim ko ahcun: (Zeimaw ruangah lih ai tel sual zongah ningcang deuh in rak tuah hna sehlaw cu) Ka hmuhning fiang tein chim ko ahcun Pres. Trump hruaimi cozah nih Kawlram visa phihkhamnak an tuahmi cu kanmah Chinmi ruangah asi bik ko, tiah ka zumh. Chin hi ram pakhat (nation/country) dirhmun rak si usihlaw Burma mi dihlak visa phih lo in kanmah Chin ram lawng khi visa an phih men lai dah ka ti.

Ka rianttuanmi he ai pehtlaimi thil asi caah vawleicung US tanzung tampi he phone kaa chawn, ca ka kuat hna; ka theihmi tanzung lakah Kawlram US tanzung khi visa kongah a strict bik an si ko lai dah ka ti. Ka ruahmi cu: catlaap (documents) siseh a minung in siseh – Chinmi cu an zumh lo ning hna a ngan tuk, tiah ka ruah.

Chinmi US ummi nih fale laaknak an tuahmi zakhat (100 ah 95%) hrawng hi cu, a fa si ma, si tak lo, tinak caah DNA test an tuah ter dih ko hna. Khoika ram ummi US tanzung hmanh nih, mah ti tatai hin visa kongah DNA test an tuah ter hna, ka thei rih lo. (Africa lei pawl khi DNA test an tuah termi a um ve ngai nain Kawlram bantuk lawmmaam cu a si lo.)

Cu lawng hlah: Malaysia ah Chin ralzaam hruaitu upa pawl daithlan ruangah maw, community upa pawl daithlan ruangah maw (silole) zeimaw ziknawh um ruangah maw siseh – kum tlawmpal a vun kal hnu ah US cozah nih lih chimnak fiang tukin tampi an vun hmuh. Chinmi kan mualpho ning a faak ngaingai. Khrifa asimi miphun nih: hi tluk in lih le hrokhrol an chim hnga, tiah an kan ruah cang. Hi thil nihhin hmailei caan zeimawzat chung thil a hnursuang dingmi a tam ko. Zapi nihcun kan hmufiang kho rih lo caah asi.

Ralzaam case rak tuah lio ah himnak (security) ruangah maw, zeimaw ruangah maw – zeimaw lih ai telnak a um sual hmanh ah: ningcang deuh tein rak tuah hna sehlaw cu, hi tiang dirhmun hi a phan hrimhrim lai lo. Chim ding a tam tuk le hi vial lawng si ko seh. Credit: Salai Van D. Ceu