Salai Lairamthang. Donald Trump Day! Ohio house representative Jon Cross le Reggie Stoltzfus nih Ohio state nih President Donald Trump upat peknak caah a chuah ni June 14 paoh ah Ohio state ah Donald Trump Day tuah dingah an i zuam lio a si.

Donald Trump nih US caah kum 5 chungah a tuah khawhmi vialte hi philh awk tha lomi an si. US president vialte lak ah a lianngam cemmi, The Greatest President In History” an si tiah a chim. 2020 President thimnak ah Donald Trump cu Ohio state nih vote 3,154,834 an pek. Ohio State ah voi hnih ning tein teinak a co khotu a si.

Nauhrawh (Abortion) le US Cozah Bawmhnak (Funding): Mah kong hi Laimi tampi nih a cungpavuan sawhsawh deuh lawngin kan theih. Pres. Biden nih zeiruang ahdah nauhrawhnak (abortion) ca-ah US cozah nih bawmhnak (funding) a peek hnga. Thilsining vun zoh tuah usih. Pres. Ronald Reagan nih 1985 ah a sermi policy pakhat cu: Mexico City policy timi (a.k.a. Global Gag Rule) ti zongah an auhmi asi. Cu policy nihcun vawleicung ram dangdang ah nauhrawhnak (abortion) lei, mibawmchaantu NGOs vialte kha US nih bawmhnak peek a kham.

Kum 1985 thok in Republican lei president asimi poah nih, cu policy cu an zulh peng ve. Nauhrawhnak mibawmchaantu NGOs vialte kha bawmhnak an phih peng ve hna. Asinain Democratic lei president asimi poah nih, cu policy cu an thah peng ve. Nu ngandamnak lei rianttuanmi, nauhrawh lei mibawnchaantu NGOs pawl kha US nih phaisa millions/billon in bawmhnak (funding) a peek hna.

Pres. Biden zong nih, cu policy cu Executive Order (EO) in a thah ve. Vawleicung ramkip ah nu/nau ngandamnak lei rianttuanmi NGOs pawl an bawmh cang hna lai. Abikin ram tthangcho lio, ram tthangcho lo le ram sifaak pawl caah abiapi khunmi asi. Aruang um lo, mah duh ning poah in nau va hrawh kha, hi bawmhnak nih ai tinh duhchanmi asi lo. HIV a ngeimi pawl tiang zong an bawmh hna. Ruahlo/tinh lo/duh na loin/kum tling loin naupawi (unwanted pregnancy) – tibantuk a um tikah: naupawi minu ii, a ngandamnak caah a herhmi an bawmh.

Counseling an tuah hmasa hna. Cu hnu ah, nauhrawh a herh ahcun hiim (safe) tein nauhrawh (abortion) tuah khawhnak sii-zung/sii-khaan ah an kalter (referral) an tuah hna, tibantuk pawl khi si. Pres. Trump nih 2017 ah bawmhnak a phih nain vawleicung ram tampi ah nauhrawh (abortion) a zor deuh hlei lo. A karh deuh leh-lam. Counselling hna tuah ta lo, a hiim (safe) lo ningin nauhrawh aa tuahmi an tam deuh leh-lam ii, naupawi nu caah ttihnung chinchin asi leh-lam.

Nu cheukhat pawl cu an ram ah buainak phunphun a um. Ralkap/tapung/misual pawl nih kumtling loin tleihhrem hna an tong. An duh na loin nau an pawi. Nu cheukhat cu, nu pawchung ummi nau kha ai ningmah lo ca-ah a nu caah ttihnung dirhmun hna a phaan. Ram dangdang, abikin Africa ram cheukhat hna ahcun HIV ngeimi an tam; nau pawi sualmi hna an um, tibantuk khi asi.

Cu bantuk dirhmun an si tikah, NGOs pawl nih an zuan hnawh hna, an bawmh hna. Nu ngandamnak (health) lei rianttuantu pawl zong nih, naupawi mi cu ttha tein bia an ruah hna, counselling an tuah hmasa hna. A donghnak ah lam (option) dang a um ti lo tikah, nauhrawh (abortion) tuah kha an bawmh hna. Cucu thil-umkal ningcang cu asi. (Note: US cozah nih nauhrawhnak (abortion) funding kong hi, zeiti sat indah thil-umkal ningcang asi, timi vun ttial duhmi asi.) By Van N Elizabeth