Trump Caah Thinphang Bak Si Cang, Iran Nih Phuhlam In Operation Soleimani A Thok Cang: Iran TV nih a langhter ning ahcun Quds Force hruaitu Gen. Qassam Soleimani thahnak phuhlamnak dingah Iraq ramah a um mi US Military Air Base pahnih cu ballistic missile zeimawzat nih an kah ti chim in hi kahnak ah hin a thimi le hliamtuar an um maw ti belte theih si lo. Mah ballistic missile hi NBC News reporter nih a chimnak ahcun Irbil- Jet engine thawng bantuk lawngte asi tiah a chim.

Iran cozah TV nih cun Iraq ram um US ralkap vanlawng ttumnak dingah an hman mi, Iraq thlanglei ah um Ain al-Asad Air Base cu an kah ko ti chim in, hi bantukin an cawlcanghnak a codename-ah Operation Martyr Soleimani tiin min an pek. Ain al-Asad Air Base hi missiles 10 in kah asi i, Erbil hmun tu hi missiles 4 in kah asi.

Iran Revolutionary Guard Corps nih an timi cu Setan bantuk simi Donald Trump ralrin pek nak le American khuakhannak fihnung tuk mi rehrulnak asi,”tiah an chim. Trump nih a thah mi Gen. Soleimani ruak vuinak cu nizan ah khan tuah si i, ruak hmuh dingah a kalmi mipi an tamtuk caah anmah le mah an i annak le buaibainak ruangah minung 40 an thi i, 214 nih hliam an tuar. Mah ruangah Soleimani ruak vui caan hi thawn asi.

Hi kongah US Defense hmunpi Pentagon nih cun Ain al-Asad Air Base le Irbil hmun kahnak missile hi khoi ka in dah a rat timi zeihmanh chimnak le biahalnak lo i, Iran nih anmah tuahmi a sinak le anmah mawhphurh asi nak kong cu an thanh colh tiah an chim. Stephanie Grisham, White House Press Secy nih cun thil umtu ning cu President Donald Trump le a Security Council pawl chimh an si cang tiin, thil um ning cu biatak tein White House hmun in kan zoh peng tiah a chim.

Pentagon ah hin Mark Esper, Defense Secy le Gen. Mark Milley, Chiarman of Joint Military Chiefs of Staff an um i, White House ah President Trump, Vice President Mike Pence le National Security Coulcil team member tthenkhat an um ve. Hi kongah President Trump nih Twitter ah a chim mi cu, Zeizong vialte hi a ttha dih ko! Atu ah kan military air base kahnak kongah cawlcangh ning (assesment) tuah lio asi. Vawlei cungah hrimnam tthabik ngei kan si bantukin thazing lei ah biafiang deuh ka ttial tthan te lai,”tiah a tar.

Tutan buainak kongah Nancy Pelosi, House Speaker nih a chim mi cu atu lio kan dirhmun zoh tikah American le vawlei pi nih raldohnak hi an tuar kho lo. Cucaah kan servicemen hna himnak le a cang cuahmah mi buainak hi a zual chinnak hnga lo biatak tein hmalak a hau,”tiah a chim ve. Iran Revolutionary Guard Force-a Aerospace Division hna nih Iran in Iraq ram um US Air Base hmun an kap nak kong cu an phuan i, Ain al-Asad Air Base hi kum 2018 Cristmas khawh Dec 26 ah President Donald Trump nih a thlithup le ruah lo ngaiin a rak tlawnnak hmun kha si.