Taxes ih Thubuai Supreme Court in Hnawlsak: Taxes State cun Geoargia, Pennsylvenia, Michigan le Wisconsin pawl cu Dantuahtu Tlangsuakbu thu tel loin hrilawk zikah dan an tuah ruangah hrilawknak rizal hnawlsak dingin hrilawknak rizal khin theinak can netabik December 7 zan nazi 12 kim zawngah US Supreme Court ah thubuai an pulut.

Hi thu hi lunglutza zet a si ih State 17 le Congressmen 110 in an dinpi. Trump acozah khalin a dinpi. Sen. Ted Cruz khalin court ah thu relsak dingin a timlamaw. Asinan thubuai relsak loin hnawl a si. Hiti an hnawlsaknak san bik cu dan fehdan a si lo ti a si. Amerika cu Federal, Republic an si tikah State thuneihnak a sang tuk. State pakhat ih thiltidan cu state dangin a tibuai dah lem lo.

Amerika President hrilawknak hi rampi hril hnakin State tinih hril an si ti sehla a dik sawn ding. State tin hin an President hrilnak dan an tuahih an hril hnuah nehtu an phuang. An thiltidan a diklo deuh veki a lang khal le sawisel an hlawh men, an State bakin an buaipi ban dah lo.

Cule danthiampawl reldan cun tu cu a tlai tuk zo. Electoral Vote thlaknak ding ni hnih/thum lawng a duh thlang. Hivek canah zovek Judge hmanin hrilawknak rizal an tidanglam duh nawn lo ti a si. Tu cu amai rel vekin Pu Trump cu mipi lainat zet mi sungtu siin Florida ah daite in a um thlang ding a bang.
Asinan a ngen rero mi Vote audit/cek an tuah lo hi cu thin a thi lo deuh a si. Ref: MTT