BAWIPA LUNGPUT HNGALH I ZUAM Tu lio kan Ram cu harnak caan ah kan um lio a si i, ral le rai nih khuacimui in a kan tuah. Kan hmai ah herhbaunak le mangțaam nih a kan a kan bawh fawn! Hi bantuk lio caan ah, zumtu hna nih kan herh bik zungzal mi cu, BAWIPA lungput hngalh hi a si. Zeicahtiah kan PATHIAN hi, aa lawmh caan a um, a ngaihchiat a caan a um, alungfah caan a um, a thinhun caan a um, a kan naih caan le a kan hlat caan zong a um.

Kan thlacamnak le kan aw a ngaih khun lio caan a um i, aa thupmi bantukin kan chawnh khawh lo caan zong a um. Ram pakhat le Miphun pakhat khat caah, biaceihnak le dantatnak a tuah caan a um i, a Vel le a Zaangfahnak a langhter i an sual a ngaihthiam hna i thluachuah a peek hna caan zong a um. Ram pakhat le Miphun pakhat khat cungah BAWIPA aa lawmh lio caan ahcun, a naih hna, a THLARAU cu Ram pumpi in a khahter. Ram pumpi in a THLARAU in a khah ahcun, daihnak le lawmhnak a um i dawtnak le i zawnruahnak a um.

Sihmanhselaw, Ram pakhat le miphun pakhat khat cungah BAWIPA aa lawmh lo i a ngaihchiat i a thinhun lio caan ahcun, lam hla pi, chawnh khawh lo bantukin a um i hnu lei a chit tawn hna. Cu tikah, satan, khuachia, thlarau țhalo hna tu kha cawlcangh a onh hna i, PATHIAN THLARAU nih a kham hna lo caah, Ram chungah rawhralnak a phunphun kha an chuah ter tawn.

Nihin vawlei cung minung hna cung ahhin, BAWIPA PATHIAN hi aa lawmh lio caan maw a si lai? Vawlei minung hna cung ahhin a lungfah i a thinhun lio caantu dah a si hnga tiah nan ruah? Cun atu lio thengte ahhin, nanmah pumpak na cungah, BAWIPA Lungput hngalh i zuam tuah. Na cungah aa lawmh lio caan maw a si hnga, na cungah aa lawmh lo lio caan dah a si hnga?

Cuticun, BAWIPA Lungput kan hngalh ningin thla kan cam cio awk le kan nun kan i sersiam cio awk a si. Cawlcangh kan timi hna zong hi, BAWIPA Lungput hngal bu tein kan cawlcangh tawn a si ahcun, a țha bik lengmangin a cawlcaang kho mi kan si lai. THIANG THLARAU nih in bawm ko hna seh. Tluang Lian ( Martar)