Tiphul khuami Pu Ṭha Lian Nih Ram A Vaihnak Ah Meithal Kahnak In Mual A Kan Liam

Chin News

Laimi cungah hibantuk thawngpang vun i theih hi cu lung afaktuk hringhran ko. Tutan thil acang mi cu lung azur hringhran ko. Hithil hi nizan ah a cang, cangmi thil asi. Nizan ah Chinram khuapi Hakha ah a ummi Pu Tha Lian cu meithal kahnak in a nunnak aliam tiah theih asi. Thil sining konghe pehtlaiin an chimmi cu atanglei bangin hin asi.

Pu Tha Lian hi Hakha peng Tiphul khuami asi i, Hakha thar ah khua asami asi. Amah hi Peng Uk zung Tiphul cazi rian attuan cuahmah mi asi. Nizan December ni 4 ah khan Tiphul ah a fapa he ram vaih ah an kal i, Afapa hi an chim ningah cun kum 13 te lawng asi rih tiah an chim. A fapa cu apa nih khah ka fapa hika Tlangcung ah hin rak um law tiah ati.

Afapa cu a pa nih Tlangcung hika hmun ah hin rak tthu rih law chikkhat te tiah ati i, a pa cu a thlang deuh ah khin a kal. Asinain tlawmpal a rauh hlan ah meithal puah thawng cu a fapa nih a theih. Cu meithal a vun puah thawng avun chuah tlawmpal ah a pa nih cun a fapa cu a vun auh. A fapa a vakal tikah cun apa cu zeihmanh holh kho loin a um cang.

Thil sining a can tlawmpal a fapa lungrethei in a um hnu ah a fapa nih cun hringtu anu cu phone in a hei chawnh i, khua hngal hna nih an va kal hnawh hna. Cuticun zanlei suimilam pasarih ah Hakha siizung an phak pi, a sinain a nunnak an chanh manh tilo. Pu Tha Lian cu tuchun suimilam pahnih le cheu ah Khuathar RC Thlanmual ah an vui tiah theih asi. Meithal hma kuanfang aluhnak hi a hnuk tang deuh ah asi tiah an chim.

Pu Tha Lian hi meithal in ai kap sualmi maw asi? a siloah pakhat khat nih dah an kah sualmi asi timi theih asi rih lo. Mah le mah meithal ruah lopi in i kah sual timi a cang ttheu tawn mi asi i, tutan ah hibantuk in thil a can zong hi mah le mah ruah lopiin a cang mi asi kho i pakhat khat zong nih an kah sualmi zong asi kho. Thilsining fiang in theih asi rih lo. Tantak mi chungkhar vialte caah thlacamnak in
bawm cio hna usih. Source: Chinlung Post

Note: Hmanthlak hi Google ta kan lakchinmi a si.

Leave a Reply