Thlacamnak in bawm hna uh sih. Tamu lei in a rak tlung mi, Kan nau le Nagaland Bible sianginn kai hna cu, Tamu sizung ah an chiah hna i, Chin State, Minister Pau Lun Min Thang le Sagaing Chin Minister Lal Thawm nih thil si ning hman chim piak ding ah le buaibainak um lo dingah an ni zuam cuahmah lio pi asi caah thlacamnak in bawm hna uh sih.

Covid-19 Lockdown ruangah Chin Bible Student India ram ah harnak a tong mi kan ram ah an tlunkhawhnak ding caah a kan Bawmtu Minister Pau Lun Min Thang cungah a hleice in lawmhnak tampi kan ngei. Mizoram in Rihkhuadar ah tluang tein a tlung kho minung 49 an si cang. Tamu lei in a tlung minung 6 konglam cu i zuam cuahmah lio pi asi. Caṭialtu: Peter Ngun Za Cung‎

An konglam tuan deuh ah kan ṭialmi rak rel chih:Covid-19 pulrai zawtnak ruangah ramkip i tlawnkainak ramri phihkhar dih a si. Cu lioah India ram ah sianginn a kaimi Lai pa 6 cu India in Myanmar ram ah a thli tein an luh caah an tlaih hna tiah thawng kan theih.

India ram, Nagaland state i Phek Pfutsero khua ah a ummi Baptist Theological College ah bible sianginn a kaimi Lai pa 6 cu India ram in hruaitu nih theihpinak tel loin le phungninglo in ram ah an lut i Pur 12 ahkhan Tamu khuapi ah an tlaih hna.

Tlaihmi pawl cu Van Rin Lian kum 25 Thantlang, Thang Cin Mang kum 21 Hakha, Sai Cung Hum kum 28 Hakha peng, Hrang Man Rin kum 28 Hakha, Cung Cin Hum kum 28 Hakha le Van Bawi Kung kum 28 Hakha hna hi an si.

India ram ah bible sianginn a kaimi sianghngakchia zeimawzat cu hruaitu hna theihpinak in tlunter dih an si hna.  Tutan an tlaihmi hna hi nawlngeitu lei nih an tluntermi hna le hruaitu nih theihpinak in a tlungmi an si lo tiah Tamu penguk tu U Kyaw Win Oo nih a chim.

“Taihmi minung 6 hna cu sizungah kan chiah hna. Covid-19 zawtnak an ngeih le ngeih lo a fian hnu ah upadi ningin biaceihpiak an si lai. Zawtnak an ngeih le ngeih lo theih lo an biaceihpiak hna usih law zawtnak an ngeih sual ahcun, thongtlami dang zawtnak an chawnh khawh hna lai ti kan phang. An zawtnak sining a fian hnu ah upadi ning tein dantak an si lai,” tiah Tamu penguk tu U Kyaw Win Oo nih a chim. Chirhchan: Tamnu News