Thlacamnak Bawm Cio Hna Usih! Kan Naunu Tiphul Khuami Covid-19 In A Zawmi A Konglam Rak Rel Hmanh! Zaangfak Tatak A Si
Tuchun (29-4-2020 sml.9:40 am) hrawngah ka DL a pawpi, a nau-inn le a hrawm ultra-sound an zeihmi result le a thi an check mi result va hlam dingah siizungpi (Hakha Civil Hospital) ah ka va kal i cu lio ahcun atu lio zawtnak Covid-19 zawtnak a ngeimi nu (Tuluk in a rak tlungmi kum-18 hrawng minung nungakte a si an ti) cu ambulance in an rak phorh i ka zoh ah ka ngaih a chia ngai.
Damlo zawtfah caan ah minung kan iherh bik lio caan a si i ahohmanh nih bawmh a ngah lo, a poi taktak, lung a fak hrinhran ko. Amah pumpak te bakin a thil aa cawi i siizung cungdot khan ah a kai. BAWIPA NIH DAMNAK PE COLH KO SEH,Amen! Kan Laitlang khualipi Hakha zong atu lio zawtnak Covid-19 nih a kan phak ve cang. Biatak tein thlacam cio kan herh i iralring deuh zong kan hau cang. Credit: Bzk Bzksathing
Update: Hakha ah COVID-19 mizaw pakhat hmuh a si. Hakha Peng Tiphul khuami kum 18 nu cu Myanmar ram Ngandamnak Zung nih April 29 zinglei suimilaam 7:00 ah COVID-19 positive a si, tiah a thanh. “Amah hi Tuluk ram in a rak tlung mi a si. Amah nih a chimnak ahcun Kalaymyo ah Quarantine an ka chiah bal cang, a ti. Hakha hi March 20 hrawng ah a phan. Hakha ahcun caan sau a um rua lo. Tiphul khua tu ahcun caan zeimawzat a um manh rua. An khua in Hakha ah Quarantine in a hung um. Hakha Na.Ta.La. sianginn ah Quarantine kan chiah. A hawile minung 7 he an thi kan kuat i April 29 zinglei suimilaam 7 ah COVID-19 positive a si, tiah an thanh. Atu hi Hakha sii-inn ah kan thial. Mizapi nih lengchuah le a bik in sii-inn lutchuah i ralrin a herh,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
Minister Pu Pau Lun Min Thang nih, “Kalaymyo ah khoika dah Quarantine an chiah, aho he dah an i naihniam bik, Hakha ah zeibantuk motor in dah a rak tlun, an khua Tiphul ah a cawlcanghnak pawl kha Ngandamnak Zung nih biatak tein an hlat cang lai,” tiah a chim fawn. Hakha Na.Ta.La. sianginn ah Quarantine minung 8 an chiah hna. Pakhat cu positive a si i a dang minung 7 hi nihin tiang ah negative an si rih, tiah kan theih. Credit: The Hakha Post